32 ވަނަ ގައުމީ އެތުލެޓިކްސް މުބާރާތުގެ ފިރިހެން ބައިގެ ޗެމްޕިއަންކަން ފުރަތަމަ ފަހަރަށް ސާއިދު ސްޕޯޓްސް ކުލަބުން ހޯދައިފި އެވެ.

ސާއިދު ސްޕޯޓްސް އިން މުބާރާތުގެ ޗެމްޕިއަންކަން ހޯދީ ފާއިތުވެދިޔަ 16 މުބާރާތުގެ ފިރެހެން ބައިގެ ޗެމްޕިއަންކަން ހޯދި ދިވެހި ސިފައިންގެ ކުލަބު ފަހަތަށް ޖައްސާލުމަށްފަހު އެވެ. އަދި މިއީ 2005 ވަނަ އަހަރުގެ މުބާރާތަށް ފަހު ފާއިތުވެދި 19 އަހަރުގެ ތެރޭގައި ދިވެހި ސިފައިންގެ ކުލަބުގެ މައްޗަށް އެހެން ޓީމަކުން ކުރިހޯދި ފުރަތަމަ ފަހަރެވެ.

މި މުބާރާތައްޓަކައި ވަރުގަދަ ޓީމެއް އެކުލަވާލައި ދުރާލައި ތައްޔާރުވާން ފެށި ސާއިދު ސްޕޯޓްސް ކުލަބުން ވަނީ ވާދަކުރި އިވެންޓުތަކުން ޖުމްލަ 171 ޕޮއިންޓް ހޯދާފައެވެ. އަދި މުބާރާތުގެ ދެވަނަ ހޯދި ދިވެހި ސިފައިންގެ ކުލަބަށް 168.5 ޕޮއިންޓް ލިބިފައިވާއިރު، ތިންވަނަ ހޯދި ނަސީރު ސްޕޯޓްސް ކުލަބުން ވަނީ 103.5 ޕޮއިންޓް ހޯދާފައެވެ.

Advertisement

މުބާރަތުގެ އެންމެ މޮޅު ފިރިހެން އެތްލީޓަކަށް ހޮވުނީ ދިވެހި ސިފައިންގެ ކުލަބުގެ ހަސަން ސާއިދު އެވެ. އޭނާ ވަނީ މިމުބާރާތުގެ 100މ އަދި 200މ ދުވުމުން އެއްވަނަ ހޯދާފައެވެ.