ކުރިއަށްއޮތް ރައްޔިތުންގެ މަޖިލީހުގެ އިންތިޚާބުގައު ޖުމްހޫރީ ޕާޓީ އާއި ޕީޕަލްސް ނެޝަނަލް ކޮންގްރެސް އެކުގައި ވާދަކުރުމަށް މަޝްވަރާކޮށްފިއެވެ.

މިކަން ހާމަކޮށް ޖުމްހޫރީ ޕާޓީގެ ތަރުޖަމާނު ޢަލީ ޞާލިޙް ވިދާޅުވެފައިވަނީ އެޕާޓީގެ ކައުންސިލުގެ 161 ވަނަ ބައްދަލުވުމުގައި ނިންމި ނިންމުމާއެކު އަންނަ މަޖިލިސް އިންތިޚާބާއި ގުޅޭގޮތުން ޕީއެންސީއާއެކު 25 ނޮވެމްބަރު 2023 ގައި ބައްދަލުވުމެއް ބޭއްވިފައިވާ ކަމަށެވެ.

ޖޭޕީ ކައުންސިލުން ނަގާފައިވާ ކޮމިޓީގެ ބޭފުޅުންނާއި، ޕީއެންސީގެ ބޭފުޅުން ވަނީ ބައދަލުކުރައްވާފައި ކަމަށާއި މި ބައްދަލުކުރެއްވުމުގައި ރައީސް ޑރ މުޙައްމަދު މުޢިއްޒު ބައިވެރިވެވަޑައިގެންނެވި ކަމަށް ޢަލީ ޞާލިޙް ވިދާޅުވިއެވެ.

Advertisement

ނަމަވެސް ބައްދަލުމުގެ ތަފްސީލް އެ ދެ ޕާޓީން ވެސް ހާމައެއް ނުކުރެއެވެ. 

ރިޔާސީ އިންތިޚާބުގެ ފުރަތަމަ ބުރުގައި ޖުމްހޫރީ ޕާޓީ އިން ކެންޑިޑޭޓޭއް ގެ ގޮތުގައި އެ ޕާޓީގެ ލީޑަރު ޤާސިމް އިބްރާހިމް ވާދަކުރެއްވިއެވެ. އަދި ފުރަތަމަ ބުރުގައި ލިބުނު މަދު ވޯޓުކޮޅާއި އެކު ދެވަނަ ބުރުގައި އެއްވެސް ކެންޑިޑޭޓަކަށް ރަސްމީކޮށް ތާއީދު ނުކުރުމަށް އެޕާޓީ އިން ނިންމިއެވެ.

އެއަށްފަހު ޖޭޕީގެ އަޑު ސިޔާސީ މައިދާނުގައި މަޑުވެލުމަށްފަހު މަޖިލިސް އިންތިޚާބުގައި ވެރިކަން ކުރާ ޕީއެންސީ އާއި އެކުވެ ވާދަކުރުމަށް މިހާރު މިވަނީ މަޝްވަރާކުރެވިފައެވެ.