އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި ޕީއެންސީ އަދި ޕީޕީއެމް އެކުގައި ނިކުންނަން ނިންމައިފި އެވެ.

މިފަދައިން ދެޕާޓީއެކުގައި ވާދަ ކުރުމަށް ނިންމާފައިވަނީ އެންމެ ފަހުން ބޭއްވި ޕީޕީއެމް ލީޑާޝިޕްގެ ސެނެޓްގައި ބައިވެރިވި ބޭފުޅުންގެ އިއްތިފާގުންނެވެ. އަދި މިކަމުގައި އިތުރަށް ކުރިއަށް ދިއުމަށް ބޭނުންވާ ދެން ހުރި ކަންކަންވެސް ދެޕާޓީގެ ޖޮއިންޓް ސެނެޓަކުން ނިންމަމުން ގެންދާނެކަމަށްވެސް ވަނީ އިއުލާން ކޮށްފައެވެ.

ރޭގައި ސެނެޓްގެ ބައްދަލުވުން ބާއްވާފައިމިވަނީ ކުރީގެ ރައީސް ޔާމީން އަބްދުލް ގައްޔޫމް ޕީޕީއެމުން ވަކިވެވަޑައިގެން އަމިއްލަ ޕާޓީއެއް އުފެއްދެވުމުގެ މަސައްކަތް ކުރައްވަމުން ދާ ދަނޑިވަޅެއްގައެވެ.

Advertisement

ރައީސް ޔާމީން ޕާޓީއިން ވަކިވެވަޑައިގަތްކަން އިއުލާން ކޮށްފައިވަނީ 23 ނޮވެމްބަރު 2023 ގައެވެ. އަދި ރޭގެ ވަގުތެއްގައި އެމަނިކުފާނުގެ އައު ޕާޓީގެ ނަމަކީ ޕީޕަލްސް ނޭޝަނަލް ފްރޮންޓް(ޕީއެން ފްރޮންޓް) ކަން އިއުލާން ކޮށްފައިވާއިރު މިއަދު ވަނީ ޕާޓީ ރެޖިސްޓަރ ކުރުމުގެ ކަންތައްތަކަށް އިލެކްޝަންސް ކޮމިޝަނަށް ހުށައަޅުއްވާފައެވެ.

ޕާޓީ ރެޖިސްޓަރ ކުރެއްވީ އެމަނިކުފާނުގެ ދަރިކަލުން ޒޭން ގެ ނަންފުޅު މަތީގައެވެ. އަދި ޕާޓީ ހިންގާ އޮފީހަކީ ކުރީގައި ޕީޕީއެމް ހިންގުމަށް ބޭނުންކުރި އޮފީހެވެ.

އެމަނިކުފާނު ޕީޕީއެމުން ވަކިވެ ވަޑައިގެންނެވީ ޕާޓީގެ ލީޑަރޝިޕްގެ ބައެއް ބޭފުޅުން އެމަނިކުފާނާ ދުރަށް ޖެހިވަޑައިގެން،ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުންދާ ކަމަށް އެމަނިކުފާނަށް ދެކެވޭތީ ކަމަށް އެމަނިކުފާނުގެ ގާނޫނީ ވަކީލު ޑރ. މުހައްމަދު ޖަމީލް އަހުމަދު ވަނީ ވިދާޅުވެފައެވެ.