ފުށިދިއްގަރުފަޅު ހިއްކާ، އެތަން ބޭނުންކުރާނޭ ގޮތުގެ ލޭންޑް ޔޫސް ޕްލޭނެއް މިހާރު އެކުލަވާލާ ނިމިފައިވާ ކަމަށާ، އެއީ 20 އަހަރުގެ ދޮގު ރާސްތާ ޕްލޭން އެއް ކަމަށް ގެދޮރުވެރިކަމާއި، ބިމާއި، ޢުމްރާނީ ތަރައްޤީއާ ބެހޭ ވަޒީރު ޑރ. ޢަލީ ޙައިދަރު ވިދާޅުވެއްޖެއެވެ.

މަޖިލީހުގެ ޤައުމީ ތަރައްޤީއާއި، ތަރިކައިގެ ކޮމެޓީގެ މިއަދުގެ ބައްދަލުވުމުގައި އެމްޑީޕީ މެންބަރުން ވަނީ މިސަރުކާރުން ކުރިއަށް ގެންދިޔުމަށް ނިންމާފައިވާ ފުށިދިއްގަރުފަޅު ހިއްކުމަށް ފައިސާ ހޯދާނެ ގޮތާއި، އެތަން ތަރައްގީ ކުރާ ސަބަބު ތަކާއި, އަދި އެތަނުގެ ލޭންޑް ޔޫސް ޕްލޭން އެއް ހެދިފައިވޭތޯ ސުވާލު ކުރައްވާފައެވެ. 

އެ ސުވާލުތަކަށް ޖަވާބުދެއްވަމުން ޑރ.ޙައިދަރު ވިދާޅުވީ، މިނިވަންކަމާއި އިސްތިޤުލާލަށްފަހު، މިސަރުކާރުން އެންމެ އިސްކަންދޭނެ އެއް ސިޔާސަތަކީ ބޯހިޔާވަހިކަމުގެ މައްސަލަ ހައްލު ކުރުން ކަމަށެވެ. އަދި މާލޭގައި ދިރިއުޅޭ ބައެއް ފަރާތްތަކަށް ގޯއްޗާއި ފުލެޓް ލިބިފައިވީ ނަމަވެސް، މާލޭގެ ތޮއްޖެހުން ކުޑަކޮށް، ބޯހިޔާވަހިކަމަށް ބޭނުންވެފައިވާ އެންމެނަށްވެސް އެ ފުރުސަތު ފަހި ކޮށްދެއްވުމަކީ ސަރުކާރުގެ އަމާޒު ކަމަށް މިނިސްޓަރު ވިދާޅުވި އެވެ. 

އެގޮތުން، ފުށިދިއްގަރުފަޅުން ގޯއްޗާއި ފްލެޓު ދިނުމުގެ ބިޔަ މަޝްރޫޢާއެކު، 75،000 ޢާއިލާއަކަށް ބޯހިޔާވަހިކަން ކަށަވަރުވެގެންދާނެ ކަމަށާ ފުށިދިއްގަރު ފަޅަކީ 20 އަހަރުގެ ދިގު ރާސްތާއަކަށް ރާވައިގެން ހިންގޭ މަޝްރޫޢެއް ކަން ޑރ. ހައިދަރު ފާހަގަކުރެއްވި އެވެ. 

މިނިސްޓަރު އިތުރަށް ވިދާޅުވީ ފުށިދިއްގަރު ފަޅުގެ ޕްލޭން ހަދައި ނިމިފައިވާ ކަމަށާ، އެތަން ހިއްކާނެގޮތާއި، އެ މަޝްރޫޢަށް ޚަރަދުވާނެ ފައިސާ ހޯދާނެ ގޮތް މިސަރުކާރުން ރާއްވަވާނެކަމަށެވެ. އެގޮތުން، މިމަޝްރޫޢަށް ބޭނުންވާ ފައިސާ ބޭރުގެ ފަރާތްތަކުން ވެސް ހޯދިދާނެކަމަށް ވަޒީރު ވިދާޅުވިއެވެ.

މާލެ ސަރަހައްދަށް ކުރިމަތިވެފައިވާ ގެދޮރުވެރިކަމުގެ މައްސަލަ ހައްލުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ އެންމެ ބިޔަ އެއް މަޝްރޫޢަކީ ފުށިދިއްގަރު ފަޅު ތަރައްޤީކުރުމެވެ. މި މަޝްރޫޢުގެ ދަށުން ހިއްކޭ ސަރަހައްދު، ހުޅުމާލޭގެ ދެ ފިޔަވަހި އެއްކޮށްލީމާ ވާ ވަރަށްވުރެ ތިން ގުނަ ބޮޑުވާނެ ކަމަށް ސަރުކާރުން ވަނީ ބުނެފައެވެ.