ހަޖަމުކުރާ ނިޒާމުގެ މައްސަލަތަކަށް ދިނުމަށް ޕާކިސްތާނުގައި އުފައްދައިގެން ވިއްކަމުން އަންނަ 'އެމިޑޯން ސަސްޕެންޝަން' ކިޔާ ބޭހެއް ރާއްޖެ އެތެރެކޮށް ބޭނުންކުރުމާއި ވިއްކުން މަނާކޮށްފިއެވެ.
މިކަން ހާމަކޮށް މޯލްޑިވްސް ފުޑް އެންޑް ޑްރަގް އޮތޯރިޓީން މިއަދު ނެރެފައިވާ ބަޔާނެއްގައި ބުނެފައިވަނީ، ޕާކިސްތާނުގައި އުފައްދާ މި ބޭހުގެ އެއްވެސް ބެޗެއް މިއަދުން ފެށިގެން ރާއްޖެ އެތެރެކުރުމާއި ވިއްކުމަކީ މަނާކަމެއް ކަމަށެވެ.
މި ބޭސް ބޭނުން ކުރުމުން މަނާކޮށްފައިވަނީ، އޭގައި ޑައިއީތައިލިން ގްލައިކޯލް (ޑީއީޖީ) އަދި އިތައިލީން ގްލައިކޯލް (އީޖީ) ހިމެނޭ ކަމަށް ޕާކިސްތާނުގެ ބޭސް ރެގިއުލޭޓު ކުރާ އޮތޯރިޓީން އަންގާފައިވާތީ ކަމަށްވެސް އެމްއެފްޑީއޭގެ ބަޔާނުގައި ބުނެފައިވެއެވެ.
އަދި މީގެ އިތުރުން މި ބޭސް އެތެރެކޮށް ވިއްކާ ފަރާތްތަކުން ބޭސް ނައްތާލަން ހަމަޖެހިފައިވާ އުސޫލާ އެއްގޮތަށް އެކަން ކުރުމަށް ވެސް އެމްއެފްޑީއޭގެ އެ އިއުލާނުގައި ވަނީ ބުނެފައެވެ.
ޕާކިސްތާނުގައި އުފައްދާ މި ބޭސް ރާއްޖެ އެތެރެކުރުން މަނާކުރި އިރު، އެ ގައުމުގައި އުފައްދާ، ކުޑަކުދިންނަށް ދޭ ސިޓްރިޒެން ސިރަޕެއް ރާއްޖެ އެތެރެކޮށް ވިއްކައި ބޭނުން ކުރުން ވެސް އެ އޮތޯރިޓީން ވަނީ މަނާކޮށްފައެވެ.
Advertisement
This content is created and paid for by advertisers and does not involve Voice Journalists
