ހައްދުފަހަނައަޅާފައިވާ އިސްރާއީލުން ފަލަސްޠީނުގެ ރައްޔިތުންނާއި ދެކޮޅަށް ހިންގަމުންދާ ގަތުލު ޢާއްމު ތަކުގެ ސަބަބުން ހާލުގައި ޖެހިފައިވާ މުސްލިމުންނަށް ދިވެހިންގެ ފަރާތުން ހަދިޔާކުރާ އެހީގެ ތަކެތި ފޯރުކޮށްދިނުމަށް ބަރާ ކޮށްފައިވާ ޓްރަކްތައް ޣައްޒާއަށް ވަދެއްޖެއެވެ. 

ދިވެހިންގެ އެހީގެ ތަކެތި ޣައްޒާއަށް ފޯރުކޮށްދެމުންދާ އައިއޭސީން ބުނީ، ޣައްޒާއަށް ވެއްދިފައިވާ ހުރިހާ ޓްރަކްތައް ފުރަތަމަ ގެންދެވުނީ އިސްރާއިލުން ވަޒަންވެރިވެގެންފައިޗާ ސަރަހައްދަށް ކަމަށެވެ. އަދި އެމީހުން އެތަކެތި ޗެކް ކުރުމަށްފަހު، އެހީގެ ތަކެތި އެހެން ޓްރަކް ތަކަކަށް ބަރާ ކޮށްފައިވާއިރު، މިހާރު އެތަކެތި ކަރީމް އަބޫ ސާލިޙް މަގުން ޣައްޒާއަށް ވެއްދިފައިވާ ކަމަށް އައިއޭސީން މައުލޫމާތު ދެއެވެ. 

އައިއޭސީން އިތުރަށް ބުނީ، ކުރިއަށް އޮތް ދުވަސްތަކުގައި ދިވެހިންގެ އެހީގެ ތަކެތި ޣައްޒާގެ ރައްޔިތުންނަށް ފޯރުކޮށް ދިނުމަށްޓަކައި އެކަމަކާއި ގުޅޭ މުއައްސަސާތަކަށް ފޯރުކޮށްދެވޭނެ ކަމަށެވެ.  

ދިވެހިންގެ ފަރާތުން ޣައްޒާއަށް ފޯރުކޮށްދިނުމަށް ވެއްދުނު މި އެހީގެ ޓްރަކް ތަކުގައި ސިއްހީ އެކިއެކި ސާމާނު ތަކާއި، ބޭހާއި، ކާބޯތަކެތީގެ ބާވަތްތައް ހިމެނޭކަން އައިއޭސީން ފާހަގަކުރެއެވެ. 

މިތަކެތީގެ އިތުރުން، ގަތުލު ޢާއްމު މެދު ކަނޑާލެވުނު މި ދަނޑިވަޅުގައި ދިވެހިންގެ އެހީގައި ފަލަސްތީނުގެ ހޮސްޕިޓަލު ތަކަށް ތެޔޮ ވެސް ވަނީ ފޯރުކޮށްދީފައެވެ. އަދި ގަތުލު ޢާއްމު ހިނގަމުންދިޔައިރުވެސް، ހާލުގައި ޖެހިފައިވާ ޢާއިލާ ތަކަށް ކާބޯތަކެއްޗާއި، ފައިސާގެ އިތުރުން އެނޫންވެސް މުހިންމު އެހީގެ ތަކެތި އައިއޭސީން ފޯރުކޮށްދީފައިވެއެވެ. 

ފަލަސްޠީނުގެ މުސްލިމުންނާއި ދެކޮޅަށް ހަރުކަށި ޖައްބާރު އިސްރާއީލުން ހިންގަމުންދާ ގަތުލު ޢާއްމު ހަތަރު ދުވަހަށް މެދުކަނޑާލަން ނިންމައި، މިދިޔަ ހުކުރު ދުވަހު ބޮން އެޅުން ހުއްޓާލާފައިވީ ނަމަވެސް، އަދިވެސް ހުޅަނގު އައްސޭރީގައި އިސްރާއީލުން އަންނަނީ މުސްލިމުން ޝަހީދު ކުރަމުންނެވެ.