އިންޑޮނޭޝިޔާގައި މިހާރު ކުރިއަށްދާ 17 އަހަރުން ދަށުގެ ފިރިހެން ވޯލްޑްކަޕް ފުޓްބޯޅަ މުބާރާތުގެ ފައިނަލުގެ ދެވަނަ ޖާގަ ފްރާންސް އިން ހޯދައިފި އެވެ.

ފުރާންސް ފައިނަލުން ޖާގަ ހޯދީ އަންގާރަދުވަހުގެ ރޭ ކުޅުވުނު ސެމީފައިނަލްގެ ދެވަނަ މެޗުގައި ވާދަވެރި ކުޅުމަކަށްފަހު 2-1 ގެ ނަތީޖާއަކުން މާލީ ބަލިކުރުމަށްފަހު އެވެ.

މިމުބާރާތުގައި މޮޅު ކުޅުމެއް ދެއްކި މާލީ އިން މުބާރާތުގެ ސެމީ ފައިނަލުން ޖާގައެއް ހޯދީ ކުއާޓާ ފައިނަލްގައި 1-0 ގެ ނަތީޖާއަކުން މޮރޮކޯ ބަލިކުރުމަށްފަހު އެވެ. އަދި ފްރާންސް ސެމީ ފައިނަލުން ޖާގަ ހޯދީ ކުއާޓާ ފައިނަލްގައި 1-0 ގެ ނަތީޖާއަކުން އުޒްބެކިސްތާން ބަލިކުރުމަށްފަހު އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މާލީ އިން މެޗު ޑޮމިނޭޓުކުރި އިރު، މިމެޗުގައި ފުރަތަަމަ ލަނޑުޖަހައި ކުރިހޯދީ ވެސް އެޓީމުންނެވެ. މިލަނޑު ފުރަތަމަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ފޯވާޑް އިބްރާހިމް ޑިއާރާ އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން މާލީ ކުރީގައި އޮވެގެންނެވެ.

މެޗުގެ ދެވަަނަ ހާފު ވެސް ވަރުގަދަކޮށް ފެށީ މަލީ އިންނެވެ. ނަމަވެސް އެޓީމަށް މެޗުގެ ކޮންޓްރޯލް ގެއްލުނީ ދެވަނަ ހާފުގެ ފެށިގެން 10 ވަނަ މިނެޓުގައި އެޓީމުގެ ޑިފެންޑަރު ސުލޭމާން ސަނޯގޯ ކުރި ފައުލަކާއި ގުޅިގެން ރެފްރީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއް ކުޅުންތެރިއަކު މަދުކޮށެވެ.

ފުރާންސް އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 56 ވަނަ މިނެޓުގައި ކާމިޔާބުކޮށްދިނީ އެޓީމުގެ ޑިފެންޑަރު އައިވަން ޓީޓީ އެވެ. މިއީ އެޓީމަށް ލިބުނު ހިލޭ ޖެހުމެއްގައި އިސްމާއީލް ބޫނެބް ގޯލުގެ ކުރިމައްޗަށް ހުރަސްކޮށްދިން ބޯޅައެއް މުޅިން ހުސްކޮށް ހުރެ ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުން ފްރާންސް މޮޅުވި ލަނޑު ދެވަނަ ހާފުގެ 69 ވަނަ މިނެޓުގައި މާލީގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމަކުން ކާމިޔާބުކޮށްދިނީ މިމެޗުގައި މޮޅު ކުޅުމެއް ދެއްކި އެޓީމުގެ އިސްމާއީލް ބޫނެބް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ފްރާންސް ކުރީގައި އޮވެގެންނެވެ.

މުބާރާތުގެ ފައިނަލް މެޗުގައި ޑިސެމްބަރު މަހުގެ ދެވަނަ ދުވަހުގެ ހަވީރު ފުރާންސް އިން ނުކުންނާނީ ޖަރުމަނާއި ދެކޮޅަށެވެ. އަދި މުބާރާތުގެ ތިންވަނަ ހޮވާ މެޗުގައި ޑިސެމްބަރު މަހުގެ އެއްވަނަ ދުވަހުގެ ހަވީރު، މާލީ ނުކުންނާނީ އާޖެންޓީނާ އާއި ދެކޮޅަށެވެ.