ޕާކިސްތާނުގެ ބޭސް އުފައްދާ ކުންފުންޏެއްކަމަށްވާ ފާމިކްސް ލެބޯޓަރީސް ޕްރައިވެޓް ލިމިޓެޑް އިން އުފައްދާ ބޭސްތަކަކުން ނުރައްކާތެރި ކެމިކަލެއް ފެނިފައިވާތީ އެ ކުންފުނިން ދިވެހިރާއްޖެއަށް ބޭސް އެތެރެ ކުރުން ވަގުތީ ގޮތުން މަނާ ކޮށްފިއެވެ. 

މޯލްޑިވްސް ފޫޑް އެންޑް ޑްރަގް އޮތޯރިޓީ، އެމްއެފްޑީއޭ އިން މިކަމާ ބެހޭގޮތުން ނެރުނު ބަޔާނެއްގައި ބުނީ، ޕާކިސްތާންގެ ލާހޯރ ގައި ހުންނަ ފާމިކްސް ލެބޯޓަރީސް ޕްރައިވެޓް ލިމިޓެޑް އިން އުފައްދާ ދިޔާ ބޭސްތަކަކުން ކެމިކަލް މާއްދާއެއް ކަމަށްވާ ޑައިއީތައިލިން ގްލައިކޯލް (DEG) އަދި އިތައިލީން ގްލައިކޯލް (EG) ފެނިފައިވާ ކަމަށެވެ.

އަދި ދުނިޔޭގެ އެކި ގައުމުތަކުންވެސް އެކުންފުނީގެ ތަފާތު ބޭސް ތަކުން މި މާއްދާތައް ފެނިފައިވާ ކަމަށް ވުމާއެކު، އެ ކުންފުނި ވަގުތީގޮތުން ބޭން ކުރުމަށް އެ އޮތޯރިޓީން ނިންމާފައިވާ ކަމަށް ބުނެފައިވެއެވެ. 

Advertisement

އެހެންކަމުން އެ ކުންފުނީގެ އެއްވެސް އުފެއްދުމެއް އެ އޮތޯރިޓީން ވަކި ގޮތެއް އަންގަންދެން ދިވެހިރާއްޖެ އަށް އެތެރެ ކުރުމާއި ، ވިއްކުމާއި ބޭނުން ކުރުމަކީ މަނާ ކަމެއް އެ އެމްއެފްޑީއޭ އިން ބުނެފައި ވެއެވެ. 

އެމްއެފްޑީއޭ ގެ އެ އިޢުލާނުގައި ވަނީ އެޕްރޫވްޑް ޑްރަގް ލިސްޓުގައި ހިމެނޭ ރާއްޖެ އެތެރެކޮށް ވިއްކުމުގެ ހުއްދަ އޮންނަ ބޭސް ލިސްޓްގައި ހިމެނޭ އެ ކުންފުނީގެ ގެ ބޭސްތައްވެސް ހާމަކޮށްފައެވެ. 

މިކަމާއި ގުޅޭގޮތުން އިތުރު މައުލޫމާތު ބޭނުންވާ ނަމަ މެޑިސިން އެންޑް ތެރަޕިއުޓިކް ގުޑްސް ޑިވިޜަންގެ ހޮޓްލައިން ނަންބަރ: 7200321 އަށް ގުޅުމަށް އެމްއެފްޑީއޭ އިން އެދިފައިވެއެވެ.

ނުރައްކާތި ކެމިކަލް ހުރުމުން ފޫޑް އެން ޑްރަގް އޮތޯރިޓީން އިއްޔެ ވަނީ އެ އޮތޯރިޓީން ހުއްދަ ދީފައިވާ ބޭސް ލިސްޓްގައި ހިމެނޭ ފާމިކްސް ލެބޯޓަރީސް ޕްރައިވެޓް ލިމިޓެޑް އުފައްދާ ދިޔާ ބޭސްތައް ބޭސްފިހާރަތަކުން ނަގައި، ހަމަޖެހިފައިވާ އުސޫލާ އެއްގޮތަށް ބޭސް ނައްތާލުމުގެ ކަންކަން ކުރިއަށް ގެންދިއުމަށް އިލްތިމާސްކޮށްފައެވެ.

އެގޮތުން ނައްތާލުމަށް އަންގާފައިވާ ބޭސް ތަކަކީ: 
1. އެލާގޯ ސިރަޕް
2. އެލައިޑް ސިރަޕް
3. އެފެލައިޑް ސިރަޕް
4. އެމިޑޯން ސިރަޕް
5. އައިރޯޕަލް ސިރަޕް
6. އެންޓިފެން ސިރަޕް