ހައްދުފަހަނަ އެޅި އިސްރާއީލުގެ ސިފައިން ދެމުން ގެންދާ ހަމަލާތަކުގެ ސަބަބުން ފަލަސްތީނުގެ ހާލުގައި ޖެހިފައިވާ ފަރާތްތަކަށް އެހީވުމަށް އާބަންކޯގެ ފަރާތުން މީގެ ކުރިން ބޭއްވި ހަރަކާތަށް ބޮޑު ތަރުހީބެއް ލިބުމާއެކު މިރޭވެސް ކުރިއަށް ގެންދަން ނިންމާފައިވާ ކަމަށް އާބަންކޯއިން ހާމަކޮށްފިއެވެ.

އެ ކުންފުނިން ކޮށްފައިވާ ޓުވީޓެއްގައި ބުނެފައިވަނީ، އަރބަންކޯގެ މުވައްޒަފުން އިސްނަގައިގެން ފަލަސްތީނަށް އެހީތެރިވުމަށް ބޭއްވުނު ފަންޑް ރެއިސިންގް އިވެންޓަށް އާންމުންގެ ބޮޑު ތަރުހީބެއް ލިބެމުންދާތީ، މިއަދުވެސް ޖަމްބަލް ސޭލް ކުރިއަށް ގެންދިއުމަށް  ހަމަޖެހިފައިވާކަމަށެވެ. 

އާބަންކޯގެ ފަރާތުން ރުއްގަނޑު 2 ސަރަހައްދުގައި ކުރިއަށް ގެންދާ ފަންޑް ރެއިޒިން ހަރަކާތަކީ، އެކުންފުނީގެ މުވައްޒަފުންގެ އިސްނެގުަމަށް ކުރިއަށް ގެންދެވޭ ހަރަކާތެކެވެ. މި ހަރަކާތް އިއްޔެ ހަވީރު ފަށާފައިވާއިރު، ހަވީރު 4:00 ނާ 6:00 ށް ވަނީ ކުރިއަށް ގެންގޮސްފައެވެ. އަދި ރޭގަނޑު 8:00 ން 10:00ށް ވަނީ ކުރިއަށް ގެންގޮސްފައެވެ.

މި އިވެންޓްގައި ފަންޑރައިޒް ކުރުމުގެ އިތުރުން ފަލަސްތީނުގެ ހާލަތާއިމެދު ހޭލުންތެރިކުރުމަށް މައުލޫމާތު ދިނުންވެސް ކުރިއަށް ދެއެވެ. އަދި މަޣްރިބް ނަމާދުގެ ކުރިން ފަލަސްތީނުގެ ރައްޔިތުންނަށް ހާއްސަ ދުޢާއެއްވެސް އިއްޔެ ވަނީ ކޮށްފައެވެ. މި އިވެންޓް ނިންމާލަމުން އައި އޭ ސީ އަށް އިވެންޓުން ލިބެމޭ ފައިސާގެ ޗެކް ހަވާލުކުރެވިގެންދާނެއެވެ.

އާބަންކޯއިން ބުނީ ކުންފުނީގެ އެދުމަކީ ފަލަސްތީނުގައި ހާލުގައި ޖެހިފައިވާ ރައްޔިތުންންސް އެހީވުމަށްޓަކައި ވީހާ ވެސް ގިނަ ބަޔަކު މި ހަރަކާތްތަކުގައި ބައިވެރިވުން ކަމަށެވެ.

މީގެ ކުރިންވެސް ފަލަސްތީނަށް އެހީވުމަށް އެހެން ޖަމީއްޔާ ޖަމަޢަތްތަކާއި މުޢައްސަސާތަކުން ކުރިއަށް ގެންގޮސްފައިވާ ހަރަކާތްތަކުގައި އާބަންކޯއިން ވަނީ ބައިވެރިވެ، އަދި އިންތިޒާމުތައް ހަމަޖެއްސުމުގައި އެހީތެރިވެދީފައެވެ.