ހުސްވެފައިވާ މާލޭގެ މޭޔަރު ކަމަށް އިދިކޮޅު އެންމެ ބޮޑު ޕާޓީ އެމްޑީޕީގެ ޓިކެޓްގައި އެމްޓީސީސީގެ ކުރީގެ އެމްޑީ އާދަމް އާޒިމް ވާދަކުރައްވަން ހަމަޖެހިއްޖެއެވެ.

އެމްޑީޕީގެ ޓިކެޓްގައި މާލޭގެ މޭޔަރުކަމަށް ވާދަކުރުމުގެ ފުރުސަތު ޢާޒިމަށް ލިބިވަޑައިގެންފައި މިވަނީ، މާލެ މޭޔަރު ކަމަށް އެމްޑީޕީގެ ފަރާތުން ވާދަކުރުމަށް ހުޅުވާލި ފުރުސަތުގައި އެހެން ބޭފުޅަކު ނަން ހުށައަޅުއްވައިފައި ނުވާތީއެވެ.

އެމްޑީޕީގެ ފަރާތުން މާލޭގެ މޭޔަރު ކަމަށް ވާދަކުރުމަށް ބޭނުންވާ ބޭފުޅުން ނަން ހުށައެޅުމަށް ހުޅުވާލައިފައި އޮތީ ޑިސެމްބަރު 1 ގެ 16:00 އާއި ހަމައަށެވެ. ވަގުތު ޖެހުނު އިރު ނަން ހުށައަޅުއްވައިފައިވަނީ ޢާޒިމް އެކަންޏެވެ. ޢާޒިމް އެމަޤާމަށް ވާދަކުރެއްވުމަށް ފޯމް ހުށައެޅުއްވެވީ 30 ނޮވެމްބަރު ވީ ދުވަހުއެވެ.

މާލޭ މޭޔަރު ކަމަށް ވާދަކުރެއްވުމުގެ ޝައުޤުވެރިކަން ކުރީގެ ޔޫތް މިނިސްޓަރ އަޙްމަދު މަޙްލޫފްވެސް ފާޅު ކުރެއްވެވިއެވެ.

އެމްޓީސީސީގެ ކުރީގެ އެމްޑީ ޢާޒިމް މިހާރު ވަނީ ސޯޝަލް މީޑީއާ ގަޔާއި އެހެނިހެން ގޮތްގޮތުންވެސް ކެމްޕޭނު ފައްޓަވައިފައެވެ. އެގޮތުން މާލެގެ މަގުތަަކަށް ނުކުންނަވައި މާލޭގެ ރައްޔިތުންނާއި ބައްދަލުކުރައްވަމުންވެސް އެބަގެންދަވައެވެ.

ޢާޒިމްގެ އިތުުރުން ޕީއެންސީ/ޕީޕީއެމް ކޯލިޝަންގެ ފަރާތުން ކުރީގެ ބަންޑާރަ ނައިބު ޢާއިޝަތު ޢާޒިމާ ޝުކޫރުވެސް ވާދަކުރެއްވުމަށް ދަނީ ކެމްޕޭނު ކުރައްވަމުންނެވެ. މީގެ އިތުރުން ރައީސް ޢަބްދުﷲ ޔާމިން އަަލަށް އުފައްދަވާ ޕާޓީ ޕީއެންއެފް އިން މާލެގެ މޭޔަރު ކަމަށް ވަދަކުރައްވަން ހަމަޖެހިފައިވަނީ ކުރީގެ ޕޮލިސް ކޮމިޝަނަރު ހުސެއިން ވަޙީދެވެ.

މާލޭ މޭޔަރު ހޮވުމަށް ބާއްވާ ބައި އިލެކްޝަން ބޭއްވުމަށް ހަމަޖެހިފައިވަނީ ޖެނުއަރީ މަހުގެ 13ވަނަ ދުވަހުއެވެ. މި ބައި އިލެކްޝަނާއި އެކު މާލެ ސިޓީ ކައުންސިލްގެ މެންބަރު (މާފަންނު މެދު ދާއިރާ)، މާލެ ސިޓީ ކައުންސިލްގެ މެންބަރު (މެދުހެންވޭރު ދާއިރާ)، މާލެ ސިޓީ ކައުންސިލްގެ މެންބަރު (ހެންވޭރު ދެކުނު ދާއިރާ / އަންނެހުންނަށް ޚާއްސަކޮށްފައިވާ ގޮނޑި) އަދި ވ. ރަކީދޫ ކައުންސިލް މެންބަރު (އަންނެހުންނަށް ޚާއްސަކޮށްފައިވާ ގޮނޑި) އަށް މެންބަރުން ހޮވުމަށެވެ.

މި ފަސް ދާއިރާއިން ކައުންސިލް ކަމަށް ކުރިމަތިލުމުގެ ފުރުސަތު ހުޅުވާލައިފައި ވަނީ މި ހިނގާ ޑިސެންބަރު މަހުގެ 13 ވަނަ ދުވަހުގެ 14:00 ނިޔަލަށެވެ.