ބޯހިޔާވަހިކަމަށް ބޭނުންވާ މީހުންގެ ވެއިޓިން ލިސްޓެއް ގާއިމް ކުރުމުގެ މަސައްކަތް ސަރުކާރުން ކުރަމުންދާ ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާގެ ވަޒީރު ޑރ ޢަލީ ހައިދަރު އަޙުމަދު ވިދާޅުވެއްޖެ އެވެ.
ނިމިދިޔަ ސަރުކާރުން ހިންގި ގެދޮރުވެރިޔާ ސްކީމްގެ ދަށުން ދޫކޮށްފައިވާ 4000 ފުލެޓް ލިބޭ މީހުންގެ ލިސްޓް ބާތިލް ނުކުރުމަށް މަޖިލީހަށް ހުށަހަޅާފައިވާ ޕެޓިޝަނަކާ ގުޅޭ ގޮތުން ޕެޓިޝަން ކޮމެޓީ އިން މިއަދު ބޭއްވި ބައްދަލުވުމުގައި ވާހަކަދައްކަވަމުން މިނިސްޓަރު ހައިދަރު ވިދާޅުވީ، އެ 4000 ފުލެޓް ދޫކުރި ގޮތާއި ގުޅޭގޮތުން 7000 ޝަކުވާއެއް އެންޓި ކޮރަޕްޝަން ކޮމިޝަނަށް ހުށަހެޅިފައިވާ ކަމަށެވެ. އެކަމާއި ގުޅިގެން ފުލެޓް ދޫކުރަން ހުއްޓާލަން އޭސީސީން ކުރީގެ ހައުސިން މިނިސްޓްރީ އަށް އެންގުމާއިއެކު، ނޮވެންބަރު މަހުގެ 16 ވަނަ ދުވަހު އެ މިނިސްޓްރީން ފުލެޓު ދިނުން ހުއްޓާލިކަން ހައިދަރު ފާހަގަކުރެއްވި އެވެ.
އަދި ފުލެޓް ދޫކުރުން މަޑު ޖައްސާލާފައިވަނީ އޭސީސީގެ އެންގުމަށް ކަމަށާޒ އޭސީސީން ބަލާ މައްސަލަތައް ބެލުމަށްފަހު، އަންގާ އެންގުމާއި ގުޅިގެން ހުރި މައްސަލަތައް ބައްލަވާނެ ކަމަށް ހައިދަރު ވިދާޅުވި އެވެ. އެފަދައިން މައްސަލަ ބެއްލެވި ނަމަވެސް، ކުރިން އޮތް ލިސްޓް ބާތިލްކޮށް އައު ލިސްޓެއް އެކުލަވާލުމަށް ސަރުކާރުން ނިންމާފައި ނުވާ ކަމަށް މިނިސްޓަރު ވިދާޅުވި އެވެ.
މިނިސްޓަރު ގެ ވާހަކަފުޅާއި ގުޅިގެން އިނގުރައިދޫ ދާއިރާގެ މެންބަރު ހަސަން މުހައްމަދު (ހަސަންޓޭ) ވަނީ، ކޮންމެ ސަރުކާރަކުން ބޯހިޔާވަހިކަމުގެ މަޝްރޫއު ތަކުގައި ގެންގުޅޭ ސިޔާސަތު ތަކުގެ ދަށުން ރައްޔިތުންނަށް ބޮޑު ތަކުލީފުތަކެއް ކުރިމަތިވާކަން ފާހަގަކުރައްވައި، މި ސަރުކާރުގެ ގެދޮރުވެރިކުރުމުގެ ސިޔާސަތު އޮތް ގޮތާއި މެދު ސުވާލު ކުރައްވާފައެވެ.
މެންބަރު ހަސަންގެ ސުވާލަށް ޖަވާބުދެއްވަމުން މިނިސްޓަރ ހައިދަރު ވިދާޅުވީ، މިސަރުކާރުގެ ބޯހިޔާވަހިކަމުގެ ސިޔާސަތު ބިނާވެފައި ވަނީ ރައްޔިތުންނަށް ދިރިއުޅެވޭނެ ފަހި މާހައުލެއް ގާއިމްކޮށް، ބޯހިޔާވަހިކުރުމުގެ މައްޗަށް ކަމަށެވެ.
އެގޮތުން ސަރުކާރުގެ ވިސްނުން މިހާރު ހުރީ، ގާނޫނީ ގޮތުން ގެންނަން ޖެހޭ ބަދަލުތައް ވެސް ގެނެސްގެން ވިޔަސް، ގެދޮރުވެރިކަމަށް ޕޯޓަލް މެދުވެރިކޮށް ފޯމު ހުށަހެޅުމުގެ ބަދަކުގައި މީހުންގެ ހާލަތަށް ބަލައިގެން ގެދޮރަށް ބޭނުން ޖެހިފައިވާ މީހުންގެ ލިސްޓެއް އެކުލަވާލުމުގެ މަސައްކަތް ކުރިއަށް ގެންދިޔުން ކަމަށް މިނިސްޓަރު ވިދާޅުވި އެވެ.
ގާނޫނެއް ހަދައިގެން ނަމަވެސް، ކޮންމެ ފަހަރަކު ލިސްޓަކަށް ހޮވޭ ބަޔަކަށް ދިނުމުގެ ބަދަލުގައި މުޅި ސިސްޓަމް ތެރެއިން، ބޯހިޔާވަހިކަމަށް އެންމެ ބޭނުންވަނީ ކޮންބައެއްކަން ދެނެގަނެ، އެމީހުންނަށް ފުލެޓް ލިބޭ ގޮތަށް ހަމަޖެއްސުން. އޭރުން ނުޖެހޭނެ ކޮންމެ ފަހަރަކު މަޝްރޫއު އެއް ހަދާ ނިންމާފައި، ޕޯޓަލްގެ ތެރެއިން އެޕްލައި ކުރާކަށް. އެހެންވީމާ، އަޅުގަނޑުމެން ގެންގުޅޭނަން ގެދޮރު ބޭނުންވާ މީހުންގެ ވެއިޓިން ލިސްޓެއް. އެހެންވީމަ އެ ލިސްޓު އަޕްޑޭޓް ކުރަމުން ދާނީ އެ ބައެއްގެ ހާލަތު ބަދަލުވާ ގޮތުން،"
ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާގެ ވަޒީރު ޑރ ޢަލީ ހައިދަރު އަޙުމަދު
މިނިސްޓަރު ވިދާޅުވީ، ވެއިޓިން ލިސްޓް ހެދުމާއި ގުޅޭ ތަފްސީލް، އެކަން ކުރިއަށްދާ މިންވަރަކުން ހާމަކުރައްވަމުންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
