ކުރީ ސަރުކާރުގެ ގެދޮރުވެރިޔާ ސްކީމްގެ ދަށުން ދޫކުރަން ނިންމި 4000 ފުލެޓް ލިބޭ މީހުންގެ ލިސްޓް އެއްކޮށް ބަދަލު ކުރަން މި ސަރުކާރުން ނިންމާފައި ނުވާ ކަމަށް ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު ޑރ އަޙްމަދު ހައިދަރު ޢަލީ ވިދާޅުވެއްޖެއެވެ. 

ގެދޮރުވެރިޔާ ސްކީމްގެ ދަށުން ފްލެޓް ލިބޭނެކަމަށް ގެޒެޓް ކުރެވިފައިވާ އެންމެހާ ފަރާތްތަކާއި އަދި ކަމުގެ މަސްލަޙަތު އޮތް އެންމެހާ ފަރާތްތަކުގެ ފްލެޓްތައް ބާތިލް ނުކުރުމަށްއެދި ހުށަހަޅުއްވާފައިވާ ޕެޓިޝަނާ ގުޅިގެން ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ބޭފުޅުންނާއެކު މިއަދު ޕެޓިޝަން ކޮމިޓީގެ މެންބަރުން ބޭއްވި ބައްދަލުކުރުމުގައި އެ ކޮމިޓީގެ މެންބަރުން ވަނީ، ފުލެޓް ލިސްޓް ރީއިވަލުއޭޓް ކުރާއިރު، ކުރިންގެ ލިސްޓް އެއްކޮށް އުވާލައި އައު ލިސްޓެއް އެކުލަވާލާނެތޯ މިނިސްޓަރާއި ސުވާލުކުރައްވާފައެވެ. 

އަދި އޭސީސީން ކުރަމުންދާ ތަހުގީގު ނިމުމާއިއެކު ފުލެޓް ދިނުމުގެ މަސައްކަތް އަލުން ފަށާނެ ކަމަށް ހައުސިން މިނިސްޓްރީން ބުނެފައިވާއިރު، އެ އިޝާރާތް ކުރައްވަނީ އެ ލިސްޓް އަލުން އެކުލަވާލައި އެއްކޮށް ބަދަލުކުރުމަށްތޯވެސް މެންބަރުން ސުވާލު ކުރެއްވި އެވެ. 

Advertisement

އެ ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ، މި ސަރުކާރުން އެ ލިސްޓަށް ބަދަލު ގެންނަން ބޭނުން ނުވާ ކަމަށެވެ. 

ގެދޮރުވެރިޔާ ސްކީމްގެ ދަށުން ދޫކުރާ 4000 ފުލެޓް ދޫކުރުމުގެ މަސައްކަތް އޭސީސީން ހުއްޓުވާފައި ވުމުން، އެކަމާއި ގުޅިގެން އެ މުވައްސަސާގެ އިސްވެރިން މަޖިލީހުގެ މިނިވަން މުވައްސަސާތަކާއި ބެހޭ ކޮމިޓީގައި ވާހަކަ ދައްކަވަމުން އޭސީސީގެ ނާއިބު ރައީސް ވަނީ، ގެދޮރުވެރިޔާ ޕޯޓަލް މެދުވެރިކޮށް ފުލެޓަށް އެދުނު ފަރާތްތަކަށް ލިބޭ މާކްސް، އެ ޕޯޓަލް އިން "އޮޓޯ އިން ޖެނެރޭޓްކުރާ" ނަމަވެސް، އެއަށްފަހު، އެ މާކްސް ބަދަލުކޮށް ޝަރުތު ހަމަ ނުވާ މީހުން ޝަރުތު ހަމަވެފައިވާ ކަމަށް ކަނޑައަޅާފައިވާ މައްސަލަތަކެއް ފާހަގަވެފައިވާ ކަމަށް ވިދާޅުވެފައެވެ. 

އެހެންކަމުން، އެ މައްސަލަތައް އޭސީސީން ބަލަމުން އަންނަ ކަމަށާ، ބަލަންޖެހޭ ކަންކަން ބަލައި ނިމުމުން ފުލެޓް ދިނުމުގެ ކަންކަން ކުރިއަށް ގެންދިޔުމަށް ގެދޮރުވެރިކަމާއި ބެހޭ މިނިސްޓްރީއަށް ދެއްވާނެ ކަމަށް އޭސީސީން ބުނެފައިވެއެވެ.