އިންފޮމޭޝަން ކޮމިޝަނަރުގެ އޮފީހުން ސަރުކާރުގެ ކުންފުނި ފެނަކަ ކޯޕަރޭޝަނުގެ ދަރަނީގެ ތަފްސީލުތައް ހާމަކުރުމަށް އަންގާފައިވަނީ ރަނގަޅަށް ކަމަށް ހައިކޯޓުން ނިންމައިފި އެވެ.
ފެނަކަ ކޯޕަރޭޝަނުން އެކި ފަރާތްތަކަށް ނުދައްކާ ހުރި ފައިސާގެ ތަފްސީލުތައް ހާމަކުރުމަށް އިންފޮމޭޝަން ކޮމިޝަނަރުގެ އޮފީހުން ވަނީ ފާއިތުވި އޮކްޓޫބަރު މަހު އެ ކުންފުންޏަށް އަންގާފަ އެވެ.
އެހެން ނަމަވެސް އިންފޮމެޝަން ކޮމިޝަނުގެ އޮފީހުން އެންގި އެންގުން އެ ކުންފުނިން ހައިކޯޓުގައި އިސްތިއުނާފުކޮށްފައިވާއިރު، މި މައްސަލައިގައި ހައިކޯޓުން ވަނީ އެ ތަފްސީލުތައް ހާމަކުރަން ނިންމި ނިންމުމަށް ތާއީދުކޮށްފަ އެވެ.
ހައިކޯޓުން ބުނީ ފެނަކައިން ފައިސާ ދައްކާންޖެހޭ ކުންފުނިތަކުގެ ނަމާއި އެހެނިހެން މައުލޫމާތަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހާމަ ނުކުރެވޭނެ މައުލޫމާތެއްކަމަށް ފެނަކައިން ބުނި ނަމަވެސް، އެ މައުލޫމާތު ހާމަކުރުމުން ތިންވަނަ ފަރާތުގެ ވިޔަފާރިއަށް ގެއްލުންވާނެކަމަށް ބެލެވެން ނެތް ކަމަށެވެ.
އޭގެ އިތުރުން އެމައުލޫމާތު ހާމަކުރުމަކީ ސިއްރު ހިފެހެއްޓުމުގެ އުސޫލާއި ޚިލާފްކަމެއްކަން ފެނަކަ އަށް ކޯޓުގައި ސާބިތުކޮށްދެވިފައި ނުވާކަމަށް ހައިކޯޓުގެ ނިންމުމުގައި ބަޔާންކޮށްފައި ވެއެވެ.
އެއާއެކު އެ މައްސަލަ ބެލި ހައިކޯޓުގެ ތިން ފަނޑިޔާރުންގެ އިއްތިފާގުން ވަނީ ފެނަކައިން ފައިސާ ދޭންޖެހޭ ފަރާތްތަކުން މައުލޫމާތު ހާމަކުރުމަށް އިންފޮމޭޝަން ކޮމިޝަނަރު އެންގި އެންގުމަށް ބަދަލު ގެންނާންޖެހޭ ސަބަބެއް ނެތްކަމަށް ކަނޑައަޅާފަ އެވެ.
Advertisement
This content is created and paid for by advertisers and does not involve Voice Journalists
