އިއްޔެ އެކަނިވެސް، ރަސްމީ ގަޑީގައި 975 މީހެއްގެ ކުށުގެ ރިކޯޑް ސާފުކޮށްދެވިފައިވާ ކަމަށް ޕްރޮސިކިޔުޓާ ޖެނެރަލްގެ އޮފީހުން ބުނެފިއެވެ.

ޕީޖީ އޮފީހުން ކުށުގެ ރިކޯޑް ސާފު ކުރުމަށް އެއްފަހަރާ ގިނަ ރިކުއެސްޓް ތަކެއް އައިސްފައިމިވަނީ ސަރުކާރު ޚިއްސާވާ ފެނަކަ ކޯޕަރޭޝަންގެ ހުރިހާ މުވައްޒަފުންގެ ކުށުގެ ރިކޯޑް ހުށައެޅުމާއި ގުޅިގެނެވެ.

“މިފަހަރު މިކުރެވުނު ތަޖުރިބާގެ އަލީގައި، ކުރިއަށް އޮތްތަނުގައި، ގަނޑުކޮށް ކުށުގެ ރެކޯޑު ސާފުކުރަން އަންނަ ބައިބައި، ވަކި ކިއުއަކުން ދާގޮތަށް ހަމަޖައްސައި، ޢާންމު ނިޒާމުގެ ތެރެއިން އަންނަ ފޯމުތަކަށް، އާދައިގެ މަތިން ދުވަހުން ދުވަހަށް ޖަވާބުދެވޭނެ ނިޒާމަކަށް، ކުށުގެ ރެކޯޑު ސާފުކޮށްދިނުމުގެ ނިޒާމު ބަދަލުކުރުމުގެ މަސައްކަތް މިދަނީ ކުރަމުން” ޕީޖީ އޮފީހުން ބުނެފައިވެއެވެ.

Advertisement

ޕީޖީ އޮފީހުން އިތުރަށް ބުނެފައިވަނީ މި ނިޒާމާއި އެކު، ވަކި ކުންފުންޏަކުން ކުރާ ކަމަކުން، ޢާންމު ރައްޔިތުންނަށް ދުވަހުން ދުވަހަށް ފޯރުކޮށްދޭ ޚިދުމަތްތަކަށް ބުރޫލެއް ނާރާ ކުރިއަށްދާނެ ކަމަށެވެ.

މީގެ އިތުރުން، ކުށުގެ ރެކޯޑެއް ނެތް މީހުންނަށް، އެމީހުން ކުށުގެ ރެކޯޑަށް އެދޭ ވަގުތު، އޮޓޮމެޓިކުން ރެކޯޑު ނެތްކަމުގެ ލިޔުމެއް، ޕީޖީ އޮފީހުގެ ލެޓަރ ހެޑުގައި ފޮނުވޭނެ ޓެކްނޮލޮޖީ މިއޮފީހުން ދިޔައީ ޓެސްޓުކުރަމުން ކަމަށް ވެސް ޕީޖީ އޮފީހުން ވަނީ ބުނެފައެވެ.

މިހަފްތާގައި ސަރުކާރު ޚިއްސާވާ ކުފުންޏަކަށް ކުށުގެ ރެކޯޑު ސާފުކޮށްދޭން ޖެހުމުން، އެއޮފީހުން ޓެސްޓުކުރަމުން އައި ޓެކްނޮލޮޖީއެއް ފައްކާކޮށްގެން ބޭނުންކުރަންވެސް ފަށައިފި ކަމަސްވެސް އެ އޮފީހުން ވަނީ ބުނެފައެވެ.

މިޓެކްނޮލޮޖީއާއެކު، ކުށުގެ ރެކޯޑެއް ނެތްމީހުންނަމަ، މިނިޓަކު 30 ކުށުގެ ރެކޯޑު ސާފުކޮށްދިނުމުގެ ޤާބިލުކަން މިހާރު އެނިޒާމުގައި ހުންނާނެ ކަމަށް ވެސް ޕޖީީ އޮފީހުން ބުނެފައިވެއެވެ.