މިއަހަރުގެ މިހާތަނަށް 1.7 މިލިއަން ފަތުރުވެރިން ރާއްޖެ ޒިޔާރަތް ކޮށްފިއެވެ.

ޓުވަރިޒަމް މިނިސްޓްރީ އިން ޢާންމު ކޮށްފައިވާ ތަފާސް ހިސާބުތަކުން ދައްކާ ގޮތުގައި މިއަހަރުގެ ނޮވެމްބަރު މަހުގެ 29 ވަނަ ދުވަހާއި ހަމައަށް 1،678،639 ފަތުރުވެރިން ވަނީ ރާއްޖެއަށް ޒިޔާރަތް ކޮށްފައެވެ. އަދި މިއީ 2022 ވަނަ އަހަރުގެ މިހާތަނަށް ޒިޔާރާތް ކުރި ފަތުރުވެރިންގެ ޢަދަދަށްވުރެ 12.9 އިންސައްތަ އިތުރު ޢަދަދެއް ކަމަށް ޓުވަރިޒަމް މިނިސްޓްރީގެ ތަފާސްހިސާބު ތަކުގައި ވެއެވެ.

މިއަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކޮށްފައިވަނީ ފެބްރުއަރީ މަހުގެ ތެރޭގައެެވެ. އެއީ 177،915 ފަތުރުވެރިންނެވެ. ފެބްރުއަރީ މަހު ދުވާލެއްގެ މައްޗަށް 6000 އަށް ވުރެ ގިނަ ފަތުރުވެރިން ރާއްޖެ އައިސްފައިވެއެވެ.

އެންމެ މަދުން ފަތުރުވެރިން ރާއްޖެ އައިސްފައިވަނީ މިއަހަރުގެ ޖޫން މަހުއެވެ. އެއީ 120،363 ފަތުުރުވެރިންނެވެ. އެެމަހު ދުވާލެއްގެ މައްޗަށް އައިސް ފައިވަނީ 3961 ފަތުރުވެރިންނެވެ.

މިއަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ ރަޝިޔާއިންނެވެ. އެއީ 191،280 ފަތުރުވެރިންނެވެ. ދެވަނަ އަށް އެންމެ ގިނަ ފަތުރުވެރިން އައިސްފައިވަނީ އިންޑިޔާއިންނެވެ. އިންޑިޔާއިން 182،659 ފަތުރުވެރިން އައިސްފައިވެއެވެ.

ތިންވަނަ އަށް އެންމެ ގިނަ ފަތުރުވެރިން އައިސްފައިވާ ޗައިނާ އިން އައިސްފައިވަނީ 175،257 ފަތުރުވެރިންނެވެ.