ކުރިއަށް ހުރި އިންތިހާބުތަކުގައި އެކުގައި މަސައްކަތް ކުރުމާބެހޭ ގޮތުން އަދާލަތު ޕާޓީ އާއި  އެމްޑީޕީއާ ދެމެދު މިއަދު މަޝްވަރާކޮށްފިއެވެ.

މިކަމާއި ބެހޭގޮތުން އެމްޑީޕީން ނެރުނު ބަޔާނެއްގައި ބުނެފައިވަނީ މިކަމަށް ކުރިއަށް ހުރި އިންތިހާބު ތަކުގައި ދެ ޕާޓީ ގުޅިގެން ކުރެވިދާނެ ކަންކަން ދެނެގަތުމަށްޓަކައި އިތުރު ބައްދަލުވުންތައް ބޭއްވުމަށް ނިންމާފައިވާކަމަށެވެ.

އަދާލަތު ޕާޓީއަކީ 2015 އަހަރުން ފެށިގެން އެމްޑީޕީއާއެކު ގިނަ ސިޔާސީ މަސައްކަތްތަކެއް ކޮށްފައިވާ ޕާޓީއެއްކަން ފާހަގަ ކޮށް އެމްޑީޕީން ބުނީ  2018 ވަނަ އަހަރު އުފެދުނު އެމްޑީޕީގެ ސަރުކާރުގައި ކޯލިޝަން ޕާޓްނަރެއްގެ ގޮތުގައި ދައުރު ނިމުމާ ހަމައަށް އަދި 2023 ވަނަ އަހަރުގެ ރިޔާސީ އިންތިހާބުގައިވެސް އެ ޕާޓީއާއި އެކު އަދާލަތުން މަސައްކަތް ކޮށްފައިވާކަމަށެވެ.

އެހެންކަމުން އަންނަ އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިހާބުގައިވެސް މި ދެޕާޓީން މަސައްކަތް ކުރާނީ އެކީގައެވެ.

އަދާލަތު ޕާޓީ ފާހަގަ ކުރެވިފައި ވަނީ އިންތިހާބު ތަކުގައި ވާދަ ކުރުން މަދު ޕާޓީއެއްގެ ގޮތުގައެވެ. އަދާލަތު އުފެދުނީއްސުރެ މިހާތަނަށް އެ ޕާޓީއަށް ކާމިޔާބު ކުރެވުނީ މަޖިލީސް އިންތިހާބުގެ އެންމެ ގޮނޑި އެކެވެ. އެއީ 2014 ވަނަ އަހަރު ޑރ. އަނާރާ ނައީމް ވާދަ ކުރެއްވި މަކުނުދޫ ދާއިރާގެ މަޖިލީސް ގޮނޑި އެވެ.

ކުރިއަށް އޮތް މަޖިލީސް އިންތިހާބުގައި 93 ދާއިރާއަކަށް މެންބަރުން އިންތިހާބު ކުރާނެ އެވެ. އެއީ މިހާރު ހިނގަމުންދާ މަޖިލީހުގައި ހިމެނޭ 87 ދާއިރާއަށްވުރެ ހަ ދާއިރާގެ އިތުރަށެވެ.