ޕްރޮސިކިއުޓަރ ޖެނަރަލްގެ އޮފީހާއި ގުޅުންހުރި ނޫސްވެރިންނަށް ބޭނުންވާ މައުލޫމާތު ފަސޭހައި ހޯދޭނެ ނިޒާމެއް އެ އޮފީހުން ޤާއިމުކޮށްފިއެވެ.

އެގޮތުން ނޫސްވެރިންނަށް ބޭނުންވާ މައުލޫމާތު ޕީޖީން ވަނީ ރައްޔިތުންގެ ޕޯޓަލްގެ ތެރެއިން ލިބޭނެ ގޮތް ހަދައިދީ، ޕީޖީ އޮފީސް ކޮރެސްޕޮންޑެންޓްސް އުފައްދާފައެވެ.

ރައްޔިތުންގެ ޕޯޓަލަކީ އާންމުންނާ މުއާމަލާތުކުރަން ތައްޔާރުކޮށްފައިވާ ޕޯޓަލެކެވެ. އީފާސް މެދުވެރިކޮށް އެ ޕޯޓަލަށް ވަދެވޭއިރު، ޕީޖީ އޮފީހުން ވަނީ މި ޕޯޓަލް ތެރޭގައި ނޫސްވެރިންނަށް ހާއްސަ ޓެބެއް ހިމަނައިފައެވެ.

Advertisement

މި ޕޯޓަލްގައި ރަޖިސްޓްރީ ވުމަށް އެ ނޫސްވެރިއަކު ނިސްބަތްވާ ނޫސް އޭޖެންސީއެއްގެ ރަސްމީ އީމެއިލް [email protected] އަށް، ނޫސްވެރިންގެ އައިޑީ ކާޑު ނަންބަރާއި ފުރިހަމަ ނަން ފޮނުވަން ޖެހޭނެއެވެ.

އެގޮތުން މި ޕޯޓަލް މެދުވެރިކޮށް އެދޭ މައުލޫމާތު ހިއްސާކުރާނީ ހަމައެކަނި އެ މައުލޫމާތެއް ހޯދަން އެދުނު ނޫސްވެރިޔާއަކަށް ކަމުގައި ޕީޖީ ޝަމީމް އެ ބޭފުޅާގެ ބްލޮގްގައި ލިޔުއްވައިފައިވެއެވެ. 

ޕީޖީ ވިދާޅުވީ ކޮރެސްޕޮންޑެންޓްސްއާ އެކީ، ނޫސްވެރިންގެ ހަބަރުތަކުގެ "އެކްސްކްލޫސިވިޓީ" ކަށަވަރުވުމުގެ އިތުރަށް މިއީ ދެފުށްފެންނަ، ހަރުދަނާ، ދުނިޔޭގެ ފެންވަރުގެ ނިޒާމަކަށް ވާނެ ކަމަށެވެ. އަދި މީގެ ސަބަބުން މައުލޫމާތު ހޯދަން ފަސޭހަވުމާއި ދެ ފަރާތުން ކުރާ މުއާމަލާތަކާ މެދު ސުވާލު އުފެދޭ ހާލަތުގައި ސައްހަ މައުލޫމާތު ވެސް ކަށަވަރު ކުރެވޭނެ ކަމަށް ވިދާޅުވިއެވެ.