ވިނަރެސް ފްލެޓްތަކުގެ ނުނިމި ހުރި މަސައްކަތްތައް އަވަސް ކުރެވޭނެ ގޮތަކާއި މެދު އާބަންކޯގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މަޝްވަރާކުރައްވައިފިއެވެ.

ފަޒުލް ވަނީ މިއަދު ވިނަރެސް އެޕާޓްމަންޓްތަކުގެ މަސައްކަތް ކުރިއަށްދާ ގޮތް ބައްލަވާލައްވާފައެވެ. ފަޒުލްގެ މި ޒިޔާރަތުގައި އެމަނިކުފާނުގެ އަރިހުގައި ވިނަރެސް މަޝްރޫޢު ކުރިޔަށްގެންދާ ކޮންޓްރެކްޓަރު ސީއެމްއީސީގެ އިސް ބޭފުޅުންވެސް ބައިވެރިވެފައިވެއެވެ.

އާބަންކޯ އިން ބުނީ އެކުންފުނީގެ މެނޭޖިންގ ޑިރެކްޓަރ ފަޒުލް ރަޝީދު ވިނަރެސް ފްލެޓްތަކަށް ޒިޔާރަތްކޮށް، އެ ސަރަހައްދުގައި ކުރިއަށްދާ މަސައްކަތްތައް ބައްލަވާލައްވައި، މިހާރު ނުނިމިހުރި މަސައްކަތްތައް ހަލުވި ދުވެލީގައި ކުރިއަށް ގެންދެވޭނެ ގޮތްތަކާމެދު މަޝްވަރާ ކުރައްވާފައި ކަމަށެވެ.

ވިނަރެސް މަޝްރޫއުގައި ހިމެނޭ 10 ޓަވަރަކީ މެދު ފަންތީގެ ބޯހިޔާވަހިކަމަށް ހާއްސަ ކޮށްގެން ހިޔާގެ ތެރެއިން ކުރިޔަށް ގެންދިޔަ މަޝްރޫއެކެވެ. ވިނަރެސް ފްލެޓްތަކުގައި ހިމެނެނީ 13 ބުރީގެ 10 ޓަވަރެވެ. އޭގެ ތެރޭގައި ތިން ކޮޓަރީގެ 1،344 އެޕާޓްމަންޓް ހިމެނެއެވެ. 

އެ މަސައްކަތް އަވަހަށް ނިންމެވުމަކީ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވައުދުފުޅެކެވެ.