ކުރިއަށް އޮތް ރައްޔިތުންގެ މަޖިލީހުގެ ޕީޕީއެމް ޕީއެންސީ ކޯލިޝަންގެ ޓިކެޓަށް ކުރިމަތިލުމަށް މާދަމާ ހުޅުވާލުމަށް އެ ކޯލިޝަނުން ނިންމައިފިއެވެ.

މިކަން ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވަނީ މިރޭ ކޯލިޝަނުގެ ސެނެޓް ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި އިއުލާން ކުރައްވާފައެވެ. 

އަދުރޭ ވިދާޅުވީ ޕްރައިމަރީ ބޭއްވުމަށް ހަމަޖެހިފައިވަނީ މި ހިނގާ ޑިސެންބަރު މަހުގެ 23 ވަނަ ދުވަހު ކަމަށެވެ.

ޕްރައިމަރީގައި ވޯޓު ލެވޭނީ ކޯލިޝަންގައި ހިމެނޭ ދެ ޕާޓީން ކުރެ ޕާޓީއެއްގެ މެމްބަރެއްގެ ގޮތުގައި މި މަހުގެ 10 ވަނަ ދުވަހާއި ހަމައަށް ރަޖިސްޓްރީ ވެފައި ތިއްބެވި ބޭފުޅުންނަށް ކަމަށް އެބޭފުޅާ ވަނީ ވިދާޅުވެފައެވެ.

ހަމަ އެހެންމެ ޕްރައިމަރީގައި ވާދަކުރުމަށް ކުރިމަތިލެވޭނީ ވެސް އެތާރީޚާއި ހަމައަށް އެ ދެ ޕާޓީން ކުރެ ޕާޓީއެއްގައި ރަޖިސްޓްރީ ވެފައި ތިބި ފަރާތްތަކަށް ކަމަށްވެސް އަދުރޭ ވިދާޅުވިއެވެ.

ޕީޕީއެމް ޕީއެންސީގެ މަޖިލިސް އިންތިހާބުގެ ޕްރައިމަރީ އަށް ކުރިމަތިލުމަށް ހުޅުވާލެވިފައިވާ މުއްދަތަކީ މި މަހުގެ 7 ން ފެށިގެން 11 ކަމަށް ކޯލިޝަނުން މައުލޫމާތު ދެއެވެ.