ކުރިއަށް އޮތް ރައްޔިތުުންގެ މަޖިލީހުގެ އިންތިހާބުގައި ވެރިކަން ކުރާ ޕީޕީއެމް/ޕީއެންސީ ކޯލިޝަންގެ މަޖިލިސް ޕްރައިމަރީގައި ވިޔަފާރިވެރިޔާ ސަން ޝިޔާމްގެ މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ފަރާތުން ވާދަކުރުމަށް ޝައުގުވެރިވާ ފަރާތްތަކަށް އެ ޕާޓީން އެ ފުރުސަތު ހުޅުވާލައިފި އެވެ. 

އެމްޑިއޭއިން މިކަމާއި ގުޅިގެން ކުރި އިއުލާނެއްގައި ވަނީ ޕީޕީއެމާއި ޕީއެންސީގެ ކޮންގްރެސް ކޯލިޝަނުން 2024 ވަނަ އަހަރުގެ މަޖިލިސް ޖަލްސާއަށް އެ ކޯލިޝަނުން ބާއްވާ ޕްރައިމަރީގައި ވާދަކުރުމުގެ ދައުވަތު އެ ޕާޓީއަށް ލިބިފައިވާ ކަމަށެވެ.

އެހެން ކަމުން، އެ ޕާޓީގެ ފަރާތުން ޕީޕީއެމް/ޕީއެންސީގެ މަޖިލިސް ޕްރައިމަރީގައި ވާދަކުރަން ޝައުގުވެރިވާ ފަރާތްތަކަށް 11 ޑިސެންބަރު ގެ 14:00 ގެ ކުރިން ހުށައެޅުމަށް އެޕާޓީން ވަނީ ހުޅުވާލާފައެވެ.

މިމަހުގެ 23 ބޭއްވުމަށް ހަމަޖެހިފައިވާ މި ޕްރައިމަރީގައި ވާދަކުރަން ޝައުގުވެރިވާ ފަރާތްތަކުގައި ފުރިހަމަވާން ޖެހޭ ޝަރުތުތަކަކީ މި މަހުގެ 10 ވާ އާދިއްތަ ދުވަހުގެ ނިޔަލަށް އެ ޕާޓީގެ މެންބަރުންގެ ދަފްތަރުގައި ހިމެނިފައިވާ ފަރާތަކަށްވުމާއި، ޕާޓީގެ ފަރާތުން އެއްވެސް އިންތިހާބެއްގައި ވާދަ ނުކުރެވޭގޮތަށް ފިޔަވަޅު އަޅާފައިވާ މީހަކަށް ނުވުމެވެ.

އެމްޑީއޭގެ އިތުރުންވެސް އެ ކޯލިޝަނަށް ތާއީދު ކުރި އެމްއެންޕީ ވެސް ޕްރައިމަރީގައި ޕީޕީއެމް/ޕީއެންސީ އާއެކު ދެން ވާދަކުރެވޭ ގޮތަށް ހަމަޖައްސާފައިވާކަން ފާހަގަކޮށްލެވެއެވެ.