ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ޒަޢާމަތުގައި، ޗައިނާއިން އިތުރު އިންވެސްޓްމެންޓްތައް އަންނާނެ ކަމުގެ ޔަގީންކަން އެ ގައުމުން ދީފައިވާ ކަމަށް އިކޮނޮމިކް މިނިސްޓަރ މުހައްމަދު ސަޢީދު ވިދާޅުވެއްޖެއެވެ. 

ސަޢީދު ކުރެއްވި ޓްވީޓެއްގައި ވިދާޅުވީ، ވިޔަފާރިއާއި ފަތުރުވެރިން އިތުރުކުރުމުގައި އިތުރު ފްލައިޓްތަކާއި، އިންވެސްޓްމެންޓާއި ތަރައްޤީގެ އިތުރު މަޝްރޫޢުތައް ރައީސް ޑރ. މުޢިއްޒުގެ ޒަޢާމަތުގައި ކުރިއަށް ގެންދާނެކަމުގެ ފުރިހަމަ ޔަޤީންކަން ޗައިނާ ސަރުކާރުން ދީފައިވާ ކަމަށެވެ.

"ނަތީޖާއަށް ހެޔޮބަދަލެއް އައްނާނެ އުއްމީދީ ދުވަސްތަކެއް އިންޝާالله." ސަޢީދު ވިދާޅުވި އެވެ. 

ސަޢީދު މިފަދައިން ވިދާޅުވެފައި ވާއިރު، އެބޭފުޅާ މިވަގުތު ހުންނެވީ، "ޗައިނާ-އިންޑިއަން އޯޝަން ރީޖަން ފޯރަމް އޮން ޑިވެލޮޕްމަންޓް ކޯޕަރޭޝަން" ގައި ބައިވެރިވެވަޑައިގެންނެވުމަށް އެ ޗައިނާގައެވެ. 

މިއީ ޗައިނާ އާއި އިންޑިއާ ކަނޑުގެ ސަރަހައްދުގެ ޤައުމުތައް ގުޅިގެން އިޤްތިޞާދީ ތަރައްޤީއަށް ކުރާ މަސައްކަތާ ގުޅޭގޮތުން މަތީ ފަންތީގެ އިސްވެރިންގެ މެދުގައި ބާއްވަވާ ރަސްމީ ފޯރަމެވެ.  

އެ ފޯރަމްގައި ބައިވެރިވެވަޑައިގަންނަވާ ޢިއްޒަތްތެރިންނަށް މަރުހަބާ ދެންނެވުމަށް ބޭއްވެވި ޖާފަތުގައި ސަޢީދު ވަނީ ވާހަކަވެސް ދައްކަވާފައެވެ.

ރައީސް މުޢިއްޒު ވެރިކަމަށް ވަޑައިގަންނަވަން ކެންޕެއިން ކުރެއްވި އިރުވެސް އަދި ވެރިކަމަށް ހުވާ ކުރެއްވުމަށްފަހުގައިވެސް އެމާނިކުފާނުވަނީ އެމަނިކުފާނު ގެންގުޅުއްވާނީ "ޕްރޯ މޯލްޑިވްސް" ސިޔާސަތެއް ކަމާއި އެއަށް ތާއީދު ކުރާ ހުރިހާ ގައުމަކާއި ގުޅުން ބާއްވަވާ، ރާއްޖޭގެ ތަރައްގީ އަށްޓަކައި މަސައްކަތް ކުރައްވާނެ ކަމަށް ވިދާޅުވެފައެވެ. 

އެގޮތުން، އެންމެ މުހިންމު ކަމަކަށް އެމާނިކުފާނު ފާހަގަކުރެއްވީ އިގްތިޞާދު ކުރިއެރުވުމަށް އިންވެސްޓްމަންޓްތައް އިތުރުކޮށް، ފަތުރުވެރިން އިތުރު ކުރުމަށް ބޭރުގެ އެކި ގައުމުތަކުން ފްލައިޓް އިތުރު ކުރުމުގެ މަސައްކަތެވެ.