ރައީސް ޑރ. މުހައްމަދު މުއިއްޒުގެ ކެބިނެޓު ހުރިހާ ވަޒީރުންގެ ޝަރުތު ހަމަވާކަމަށް ކަނޑައަޅައި، ވަޒީރުންނަށް ރުހުން ހޯދުމުގެ ވޯޓު، ވަކިވަކިން ނެގުމަށް ސަރުކާރު މަސްއޫލިއްޔަތު އަދާ ކުރާ މިންވަރު ބަލާ ކޮމެޓީން ފާސްކޮށްފިއެވެ.

މިއަދު ބޭއްވި ކޮމެޓީގެ ބައްދަލުވުމުގައި ކޮމެޓީގެ މުގައްރިރު މާފަންނު ހުޅަނގު ދާއިރާގެ މެންބަރު މުހައްމަދު ފަލާހް ވަނީ، އެހެން ގައުމެއްގެ ރަށްވެހިކަން ނެތުމަކީ ވަޒީރެއްގެ ކިބާގައި ހުންނަންޖެހޭ ޝަރުތެއް ކަމުން އެކަން ކަށަވަރުކޮށްފައިވާނެ ކަން ފާހަގަކުރައްވާފައެވެ. 

އެގޮތުން ބެލި ބެލުމުން އެހެން ގައުމެއްގެ ރަށްވެހިކަން މީގެކުރިން އޮތް ދެ ވަޒީރުން ކަމަށްވާ ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާގެ ވަޒީރު ޑރ. އަލީ ހައިދަރާއި، މަތީ ތަޢުލީމާއި ބެހޭ ވުޒާރާގެ ވަޒީރު ޑރ. މަރިޔަމް މާރިޔާގެ އަތުގައި އޮތް އެހެން ގައުމެއްގެ ރަށްވެހިކަން، ވަޒީރު ކަމާއި ހަވާލުވެވަޑައިގެންނެވުމުގެ ކުރިން ދޫކޮށްލާފައިވާކަން އެނގިފައިވާ ކަމަށް ފަލާހް ވިދާޅުވި އެވެ.

އެހެންކަމުން އިހަވަންދޫ ދާއިރާގެ މެމްބަރު މުހައްމަދު ޝިފާއު ވަނީ، ކެބިނެޓަށް އައްޔަން ކުރައްވާފައިވާ ހުރިހާ ވަޒީރުންގެ ޝަރުތު ހަމަވާކަމަށް ކަނޑައަޅައި މަޖިލީހުގެ ތަޅުމުން ކޮންމެ ވަޒީރަކަށް ވަކި ވަކިން ވޯޓަށް އަހައިގެން ރުހުން ދިނުމަށް ހުށަހަޅުއްވާފައެވެ.

ޝިފާއުގެ އެ ހުށަހެޅުން ކޮމެޓީގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާގުން ވަނީ ފާސްކޮށްފަ އެވެ.