އަންހެނުންނަށް ޚާއްސަކޮށް ދިމާވާ ސިއްޙީ އެކިއެކި މައްސަލަތަކަށް ފަރުވާ ކުރުމަށް ކުރަންޖެހޭ ހުރިހާ ޚަރަދެއް އާސަންދައިންދޭ ގޮތަށް ސަރުކާރުން ނިންމައިފިއެވެ. 

ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓުން މިއަދު ނިންމާފައިވާ މުހިންމު ނިންމުތަކާއި ގުޅޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް އޮފީހުގެ އަންޑަރ ސެކެރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުالله ޚަލީލް ވިދާޅުވީ، ވޭތުވެދިޔަ 2 އަހަރަށް ބަލާލި ނަމަވެސް ވަރަށް ގިނަ އަންހެނުން ޕީސީއޯއެސް އާއި އެންޑޯމެޓްރިއޯސިސްއަށް ފަރުވާ ހޯދާފައިވާކަމަށް ތަފާސް ހިސާބުތަކުން ދައްކާ ކަމަށެވެ. 

ފިރުޒުލް ވިދާޅުވީ، ޕީސީއޯއެސް އާއި އެންޑޯމެޓްރިއޯސިސްގެ ފަރުވާގެ ކަންކަން މިހާރު އޮތް ގޮތުން، އެ ބަލި ޑައިގްނޯސް ކުރެވޭ ގޮތެއްގެ ސަބަބުން އެކަމަށް އާސަންދައިން އެކަމުގެ ހުރިހާ ޚަރަދުތައް ހަމަޖައްސައި ނުދޭ ކަމަށެވެ. 

އެހެންކަމުން، އެކަން ހައްލުކޮށް، މި ދެ ބައްޔާއި، އަންހެނުންނަށް ޚާއްސަކޮށް ދިމާވާ އެފަދަ ބަލިތަކަށް އާސަންދައިން ހުރިހާ ޚަރަދެއް ކުރާ ގޮތަށް މިއަދުގެ ކެބިނެޓް ބައްދަލުވުމުގައި ނިންމާފައިވާ ކަމަށް އޭނާ ވިދާޅުވި އެވެ. 

ފިރުޒުލް ވިދާޅުވީ، މި ނިންމުމަކީ ފާއިތުވި ހަފްތާގެ ކެބިނެޓް ބައްދަލުވުމުގައި، ދަރިމައި ވުމުގެ މައްސަލަ ތަކާއި އައިވީއެފް އަށް އާސަންދައިން ޚަރަދުކުރާ ގޮތަށް ނިންމި ނިންމުމާއި ގުޅޭ, އަދި އެ ނިންމުމަށް ބޮޅެއް އިތުރު ވެގެންދާނެ ނިންމުމެއް ކަމަށެވެ. 

މީގެ އިތުރުން، މިއަދުގެ ކެބިނެޓް ބައްދަލުވުމުގައި އަންހެނުންގެ މިފަދަ ސިއްހީ މައްސަލަތަކާއި ގުޅިގެން، ސިއްހީ ދާއިރާގައި މަސައްކަތް ކުރާ މުވައްޒަފުންނާއި އާއްމުން ހޭލުންތެރިކުރުމަށް ވެސް މަސައްކަތް ކުރުމަށް މިއަދު ނިންމާވާފައިވާ ކަމަށް ފިރުޒުލް ވިދާޅުވި އެވެ.