ޔުއެފާ ޗެމްޕިއަންސްލީގު ގްރޫޕް ސީގައި ރޭ ރަށުން ބޭރުގައި 3-2 ގެ ނަތީޖާއަކުން ޖަރުމަނުގެ ޔޫނިއަން ބާލިން އަތުން މޮޅުވެ ގުރޫޕް ސްޓޭޖުގެ މެޗުތައް ރެއާލުން ނިންމާލީ ސަތޭކަ ޕަސެންޓް ރެކޯޑަކާ އެކުގައެވެ.

މިމެޗަށް ނުކުތްއިރު ވެސް ގުރޫޕްގެ އެއްވަނަ ޓީމުގެ ގޮތުގައި މުބާރާތުގެ ދެވަނަ ބުރުގެ ޖާގައެއް ރެއާލް މެޑްރިޑަށް ކަށަވަރުވެފައިވާއިރު، މިމެޗަށް އެޓީމުން ނުކުތީ ވެސް ބަދަލުތަކަކާއި އެކުގައެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ރެއާލް މެޑްރިޑުން މެޗު ޑޮމިނޭޓުކުރި އިރު ފުރަތަމަ ހާފުގެ 40 ވަނަ މިނެޓުގައި ޔޫނިއަން ބާލިންގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ވަނީ ރެއާލް މެޑްރިޑަށް ޕެނަލްޓީއެއް ދީފައެވެ.

ނަމަވެސް އެޓީމުގެ ތަޖުރިބާކާރު މިޑްފިލްޑަރު ލޫކާ މޮޑްރިޗް ކުރިއަށް ފޮނުވާލި ޕެނަލްޓީ ޔޫނިއަން ބާލިންގެ ގޯލު ކީއްޕަރު ވަނީ ހުޝިޔާރުކަމާއެކު ދިފާއުކޮށްފައެވެ. އަދި ޖެހިގެން އައި މިނެޓުގައި ޔޫނިއަން ބާލިން އިން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ޖަރުމަނުގެ ފޯވާޑް ކެވިން ވޮލެންޑް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ޔޫނިއަން ބާލިން ކުރީގައި އޮވެގެންނެވެ.

މެޗުގެ ދެވަަނަ ހާފުގައި ރެއާލް މެޑްރިޑުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 61 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ހޯސެލޫ އެވެ. މިއީ އެޓީމުގެ ބްރެޒިލް ފޯވާޑް ރޮޑްރީގޯ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިމެޗުގައި ރެއާލް މެޑްރިޑުން ފުރަތަަމަ ފަހަރަށް ލީޑު ހޯދި ލަނޑު ދެވަނަ ހާފުގެ 72 ވަނަ މިނެޓުގައި ކާމިޔާބުކޮށްދިނީ ވެސް ހޯސެލޫ އެވެ. މިއީ އެޓީމުގެ ފަރާން ގާސިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޔޫނިއަން ބާލިން އިން މެޗުގެ ނަތީޖާ ދެވަނަ ފަހަރަށް އެއްވަރުކުރީ ދެވަނަ ހާފުގެ 84 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ޗެކްރިޕަބްލިފެ ފޯވާޑް އެލެކްސް ކްރަލް އެވެ. ނަމަވެސް އޭގެ ހަތަރު މިނެޓު ފަހުން ރެއާލްގެ ޑެނީ ސަބެއްލޯ ވަނީ ލަނޑެއް ކާމިޔާބުކޮށް އެޓީމަށް މިމެޗުގައި ތިންވަނަ ފަހަރަށް ލީޑު ހޯދައި ދީފައެވެ.

މިމެޗުން ލިބުނު ތިން ޕޮއިންޓާއެކު ކުޅުނު 6 މެޗުން ވެސް މޮޅުވެ، 18 ޕޮއިންޓާއެކު ރެއާލް މެޑްރިޑުން ގްރޫޕް ސްޓޭޖުގެ މެޗުތައް ނިންމާލީ ގުރޫޕްގެ އެއްވަނައިގައެވެ. އަދި މިމެޗުން ބަލިވި ކުޅުނު 6 މެޗުން ލިބުނު 2 ޕޮއިންޓާއެކު އެޓީމުން މުބާރަތް ނިންމާލީ ގްރޫޕްގެ ފުލުގައި އޮވެއެވެ.

މިގުރޫޕްގައި ރޭ ނަޕޯލީ އާއި ބްރާގާ ވާދަކުރި މެޗު 2-0 ގެ ނަތީޖާއަކުން މޮޅުވެ، 6 މެޗުން ލިބުނު 10 ޕޮއިންޓާއެކު ގުރޫޕްގެ ދެވަނަ ހޯދީ ނަޕޯލީ އިންނެވެ. އަދި އެމެޗުން ބަލިވި، ބްރާގާ އިން ކުޅުނު 6 މެޗުން ލިބުނު 4 ޕޮއިންޓާއެކު ގުރޫޕްގެ ތިންވަނަ ޓީމުގެ ގޮތުގައި ޔޫރޮޕާ ލީގު ދެވަނަ ބުރުން ޖަގަ ހޯދީ ބްރާގާ އިންނެވެ.