ޔުއެފާ ޗެމްޕިއަންސްލީގު ގްރޫޕް އޭގައި ރޭ އަމިއްލަ ދަނޑުގައި 1-0 ގެ ނަތީޖާއަކުން ބަޔާން މިއުނިކް އަތުން ބަލިވެ މެންޗެސްޓާ ޔުނައިޓެޑް މުބާރާތުން ކަޓައިފި އެވެ.

މިމެޗަށް ނުކުތްއިރު ވެސް ގުރޫޕްގެ އެއްވަނަ ޓީމުގެ ގޮތުގައި ބަޔާން މިއުނިކަށް މުބާރާތުގެ ދެވަނަ ބުރުގެ ޖާގައެއް ކަށަވަރުވެފައިވާއިރު، މެޗުގެ ފުރަތަަމަ ހާފުގައި ދެޓީމުގެ ފަރާތުން ފެނިގެންދިޔައީ ދާދި ހަމަހަމަ ކުޅުމެކެވެ. އަދި މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

ނަމަވެސް ފުރަތަމަ ހާފު ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

މެޗުގެ ދެވަަނަ ހާފުގައި ބަޔާން މިއުނިކުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 70 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ފުރާންސްގެ ފޯވާޑް ކިންގްސްލީ ކޯމަން އެވެ. މިއީ އެޓީމުގެ އިގިރޭސި ފޯވާޑް ހެރީ ކޭން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިހާފުގައި ޔުނައިޓެޑުގެ ފަރާތުން ވަރަށް އާދައިގެ ކުޅުމެއް ފެނިގެންދިޔަ އިރު، ބަޔާންގެ ގޯލާއި އަމާޒުކޮށް އެޓީމަށް މިހާފުގައި އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. މިއާއެކު މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބަޔާން މިއުނިކް ކުރީގައި އޮވެގެންނެވެ.

މިއީ ޗެންޕިްއަންސް ލީގުގެ ގްރޫޕް ސްޓޭޖްގައި ބަޔާން މިއުނިކް ބަލިނުވެ ފުރިހަމަކުރި 40 ވަނަ މެޗެއެވެ. އޭގެތެރެއިން 36 މެޗުން އެޓީމު މޮޅުވެފައިވާއިރު ހަތަރު މެޗު ނިމުނީ އެއްވަރުވެގެންނެވެ. އަދި މިއީ ޔުނައިޓެޑްގެ ދަނޑުގައި ޖަރުމަނުގެ ކުލަބުތަކާއި ދެކޮޅަށް އެންމެ ފަހުން ކުޅުނު 12 މެޗުގެ ތެރެއިިން އެޓީމު ބަލިވި ފުރަތަަމަ މެޗެވެ. އޭގެ ތެރެއިން 8 މެޗުން ޔުނައިޓެޑް މޮޅުވެފައިވާއިރު ތިން މެޗު ނިމިފައި ވަނީ އެއްވަރުވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު 6 މެޗުން ލިބުނު 16 ޕޮއިންޓާއެކު ގުރޫޕްގެ އެއްވަނަ ހޯދީ ބަޔާން މިއުނިކުން ނެވެ. އަދި މިމެޗުން ބަލިވި މެންޗެސްޓާ ޔުނައިޓެޑް ކުޅުނު 6 މެޗުން ލިބުނު 4 ޕޮއިންޓާއެކު އެޓީމު މުބާރާތް ނިންމާލީ ގުރޫޕްގެ ފުލުގައި އޮވެއެވެ.

މި ގުރޫޕްގައި ގަލަތަސަރާއީ އާއި ދެކޮޅަށް ކޯޕަންހޭގަން ކުޅުނު މެޗު 1-0 ގެ ނަތީޖާއަކުން މޮޅުވެ 6 މެޗުން ލިބުނު 8 ޕޮއިންޓާއެކު ކޯޕަންހޭގަން އިން ގުރޫޕްގެ ދެވަނަ ހޯދިއިރު، މިގުރޫޕްގެ ތިންވަނަ ޓީމުގެ ގޮތުގައި ޔޫރޮޕާ ލީގު ދެވަނަ ބުރުން ޖާގަ ލިބުނީ 6 މެޗުން 5 ޕޮއިންޓް ހޯދި ގަލަތަސަރާއީ އަށެވެ.