ހިމަބިއްސާއި ރުބެއްލާއަށްދޭ "އެމްއާރް" ވެކްސިން ދިނުމުގެ ގައުމީ ކެމްޕެއިން މާދަމާ ފެށުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމައިފި އެވެ.
އެޗްޕީއޭއިން ނެރުނު އިއުލާނެއްގައި ބުނީ 14 ޑިސެންބަރު ވާ ބުރާސްފަތި ދުވަހުން ފެށިގެން މީސިލްސް ވެކްސިންގެ ދެ ޑޯޒު ފުރިހަމަނުކޮށް ތިބި 18 މަހާއި 49 ދެމެދުގެ އެންމެހައި ފަތާތްތަކަށް މާލޭގެ ވެކްސިން ސެންޓަރުތަކުގެ އިތުރުން އަތޮޅުތެރޭގެ ހޮސްޕިޓަލު އަދި ހެލްތު ސެންޓަރުތަކުން މި ވެކްސިން ދެމުން ގެންދާނެ ކަމަށެވެ.
ދިވެހިންގެ އިތުރުން މި ވެކްސިންގެ ދެ ޑޯޒު ހަމަނުކުރާ ބިދޭސީންނަށް ވެސް ވެކްސިން ދިނުމަށް އެޗްޕީއޭ އިން ވަނީ ނިންމާފައެވެ.
މާލެ ސަރައްހަދުގައި ވެކްސިން ދިނުން ކުރިއަށްގެންދަން ހަމަޖެހިފައިވަނީ ދަމަނަ ވެށި، އޭޑީކޭއާއި ހުޅުމާލެ ހޮސްޕިޓަލުގެ އިތުރުން ހުޅުމާލެ ފޭސް ދޭއްގެ 16 ވަނަ ޓަވަރުގައި ހުންނަ ޖީ.ޕީ ކްލިނިކުންނެވެ.
2017 ވަނަ އަހަރު ރާއްޖެއިން ހިމަބިހި ނައްތާލި ނަމަވެސް 2020 ވަނަ އަހަރު ހިމަބިހީގެ ކޭސްތަކެއް ފެނިފައިވެއެވެ. މިކަމާ ދެކޮޅަށް ކެމްޕެއިނެއް އެ އަހަރު ފެށިނަމަވެސް ކޮވިޑުގެ ބަލިމަޑުކަމާއި ހެދި އެ ކެމްޕެއިން ވަނީ މެދުކަނޑާލާފައެވެ.
2020 ވަނަ އަހަރު ރާއްޖެއިން ރުބެއްލާ ވެސް ނައްތާލާފައިވާކަމަށް ދުނިޔޭގެ ސިއްހަތު ޖަމިއްޔާއިން ފާހަގަކޮށްފައިވެއެވެ.
ހިމަބިއްސަކީ ވައިރަހެއްގެ ސަބަބުން ޖެހޭ ގައިން ގަޔަށް އަރާ ނުރައްކާތެރި ބައްޔެކެވެ. މި ބަލީގެ އަލާމަތްތަކުގެ ތެރޭގައި ހުން އައުމާއި ކެއްސުމާއި ދެލޮލުން ފެން އައުން ހިމެނެއެވެ. ރުބެއްލާ އަކީ ވެސް ވައިރަހަކުން ޖެހޭ ބައްޔެކެވެ. މިބަލީގެ އަލާމާތްތަކުގެ ތެރޭގައި ކަރު ތެރޭގައި ރިއްސުމާއި ގައިގެ އެކި ހިސާބުތަކުގައި ބިހިތަކެއް ނެގުން ހިމެނެއެވެ.
Advertisement
This content is created and paid for by advertisers and does not involve Voice Journalists
