މިއަހަރު ރެކޯޑް އަދަދަކަށް ރާއްޖެއަށް ފަތުރުވެރިން ޒިޔާރަތް ކޮށްފައިވާކަމަށް ޓުއަރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީގެ ޑެއިލީ ރިޕޯޓުން ދައްކާގޮތުގައި މިމަހުގެ 12 ވަނަ ދުވަހާއި ހަމައަށް ރާއްޖެއަށް 1,752,706 ފަތުރުވެރިން ވަނީ ޒިޔާރަތްކޮށްފައެވެ. މިއީ 2022 ވަނަ އަހަރު ފަތުރުވެރިން ރާއްޖެއަށް ޒިޔާރަތް ކުރި އަދަދާއި އަޅާ ބަލާއިރު 77،403 ފަތުރުވެރިންގެ ކުރިއެރުމެކެވެ.

މީގެކުރިން ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވާ ކަމަށް ރެކޯޑުކުރެވިފައިވަނީ 2019 ވަނަ އަހަރު އެވެ. އެއަހަރު ރާއްޖެއަށްވަނީ 1،702،831 ފަތުރުވެރިން ޒިޔާރަތްކޮށްފަ އެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ކޮންމެ ދުވަހަކުވެސް 5000 އަށް ވުރެ ގިނަ ފަތުރުވެރިން ރާއްޖެއަށް ޒިޔާރަތް ކުރެއެވެ. ފަތުރުވެރިން ރާއްޖޭގައި އެވަރެޖް ކޮށް 7 ދުވަސް ހޭދަކުރާކަމަށްވެސް ތަފާސް ހިސާބު ތަކުން ދައްކައެވެ.

މިއަހަރުގެ އަމާޒަކީ ރާއްޖެއަށް 1.8 ފަތުރުވެރިން ގެނައުމެވެ. މިހާރު އައިސްފައިވާ 1.7 މިލިއަން ފަތުރުވެރިންނަށް ބަލައި، މި އަމާޒު ހާސިލްކުރުމަށް ދެން ބޭނުންވަނީ 47،294 ފަތުރުވެރިންނެވެ. 

މިވަގުތު ރާއްޖޭގެ ރިސޯޓުތަކާއި، ގެސްޓް ހައުސްތަކާއި ހޮޓަލްތަކާއި، ސަފާރީ ހިމެނޭހެން 1،135 ތަނަކުން ފަތުރުވެރިންނަށް ދަނީ ޚިދުމަތްދެމުންނެވެ.