ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ވަޢުދުފުޅާއި އެއްގޮތަށް، ދަޢުލަތުގެ ޚަރަދުގައި ބޯން މެރޯ ހަދާ ތެލެސީމިއާ ފުރަތަމަ ބަލިމީހާ ފަރުވާއަށް ބޭރަށް ފުރައިފިއެވެ. 

މިމަހު 10 ވަނަ ދުވަހު ބޭއްވި ކެބިނެޓް ބައްދަލުވުމުގައި ތެލެސީމިއާ އާއި ގުޅުން ހުރި ގިނަ މުހިންމު އެއް ނިންމުންތަކެއް ވަނީ ނިންމާފައެވެ. 

އެހޮތުން ތެލަސީމިއާ އާއި ގުޅުން ހުރި ހުރިހާ ކަމަށް ފަރުވާ ކުރެވޭނެ އެކަމަށް ޚާއްސަ ހޮސްޕިޓަލެއް ރާއްޖޭގައި ގާއިމް ކުރުމަށް ނިންމާފައިވާއިރު މިހޮސްޕިޓަލް ތަރައްޤީކުރެއްވުމަށް ނިންމަވާފައިވަނީ ބޯން މެރޯ ޓްރާންސްޕްލާންޓު އޮޕަރޭޝަންވެސް ކުރެވޭނެ ފެންވަރަށް ކަަމަށާ، އަދި ތެލަސީމިއާ އަށް ފަރުވާ ކުރަން ރާއްޖޭގެ ރަށްރަށުން އަންނަ ފަރާތްތަކަށް އެތަނުގައި ހުރެވޭނެ އިންތިޒާމްވެސް ހަމަޖެހޭ ގޮތަށް ކަމަށް އެދުވަހު ފިރުޒުލް ވިދާޅުވި އެވެ. 

ފިރުޒުލް އިތުރަށް ވިދާޅުވީ، ތެލަސީމިއާ ހޮސްޕިޓަލް އެޅުމުގެ ޚަރަދާ ގުޅޭ ގޮތުން މަޝްވަރާކޮށްފައިވަނީ 25 މިލިއަން ޑޮލަރުގެ ބަޖެޓަކާއެކު ކުރިއަށްދާން ކަމަށެވެ. 

މީގެ އިތުރުން އެ ދުވަހު ނިންމާފައިވާ މުހިންމު ނިންމުތަކަކީ؛ 

• ތެލެސީމިއާ ބައްޔަށް ފަރުވާ ހޯދާ ފަރާތްތަކަށް ބޭނުންވާ ބޭހާއި ކޮންސިޔުމަބަލްސް އާސަންދައިގެ ދަށުން އެސްޓީއޯއިން ހިލޭ ލިބޭނެ އިންތިޒާމް ހަމަޖެއްސުން. 

• ޑީއެންއޭ ޓެސްޓު ހަދަން ކުރަންޖެހޭ ޚަރަދު އާސަންދައިން ހަމަޖެއްސުން. އަދި ސަރުކާރުގެ ރަސްމީ ނިޒާމުގެ ތެރެއިން ޑީއެންއޭ ޓެސްޓު ހެދޭނެގޮތް ހަމަޖެއްސުން

• އަތޮޅު ތެރޭގައި ތެލެސީމިއާ ޓެސްޓް ހެދޭނެ އިތުރު މަގުތައް ފަހިކޮށްދިނުން

• ޓާޝިއަރީ ހޮސްޕިޓަލް ތަކުގައި ބްލަޑް ބޭންކް ގާއިމް ކުރުން

• 20 އަހަރުގެ ޕްލޭން އެކުލަވާލާއިރު، ތެލެސީމިއާ އަށް ހޭލުންތެރިކޮށް، ރާއްޖެއިން ތެލެސީމިއާ ބަލި ނައްތާލުމަށް މަސައްކަތްކުރުން

• ތެލެސީމިއާ ބައްޔަށް ފަރުވާ ކުރާ ފަރާތް ތަކުގެ ހަށިގަނޑުގެ އެކި ގުނަވަންތަކުގައި އަޔަން މާއްދާ ހަރުލާފައިވާ މިންވަރު ދެނެގަތުމަށް ހަދާ ޓެސްޓު، އާސަންދައިގެ ތެރެއިން، އިތުރު އެހެން އެއްވެސް މަރުހަލާއަކާއި ނުލައި ފަސޭހައިން ހެދޭގޮތް ހަމަޖެއްސުން

• އަންނަ އަހަރު ދައުލަތުގެ ބަޖެޓުގައި 5 ކުއްްޖަކަށް ބޯންމެރޯ ޓްރާންސްޕްލާންޓް ހަދައިދިނުން. އަދި އެ ޚިދުމަތަށް އެދިފައި ތިބި ހުރިހާ ކުދިންނަށްވެސް ކުރިއަށް އޮތް ތަނުގައި އެ މަގު ފަހި ކޮށްދިނުން

މިކަން ކަމަާއި ގުޅޭގޮތުން އިތުރަށް މަޢުލޫމާތު ދެއްވަމުން މިއަދު ބޭއްވި ނުސްވެރިންގެ ބައްދަލުވުމުގައި ވާހަކަދައްކަމުން ރައީސުލްޖުމްހޫރިއްޔާގެ އޮފީހުގެ އަންޑަރ ސެކެޓްރީ ފޮރ ޕަބްލިކް ޕޮލިސީ މުޙައްމަދު ފިރުޒުލް އަބްދުالله ޚަލީލް ވިދާޅުވީ، ދައުލަތުގެ ޚަރަދުގައި ބޯން މެރޯ ހަދާ އެއް ކުއްޖަކު މިއަދު އެކަމަށްޓަކައި ފުރާފައިވާ ކަމަށެވެ. 

ފިރުޒުލް އިތުރަށް ވިދާޅުވީ ކުރިއަށް އޮތް މަދު ހަފްތާ ތެރޭގައި، ކެބިނެޓްގެ ނިންމުމާއި އެއްގޮތަށް ތެލެސީމިއާއަށް ފަރުވާ ކުރާ ފަރާތްތަކަށް ބޭސް ލިބުމާއި، ދެންވެސް އާސަންދަ މެދުވެރިކޮށް އެހެން ޚިދުމަތްތައް ލިބުން ފަސޭހަކަމާއި އެކު ކުރެވޭނެ މަގު ފަހިވެގެންދާނެ ކަމަށެވެ. 

އަދި ތެލެސީމިއާ އަށް ޚާއްސަ ހޮސްޕިޓަލެއް އެޅުމަށް ކުރަންޖެހޭ މަސައްކަތް ވެސް މިހާރު ފެށިގެން ކުރިއަށްދާކަން އޭނާ ފާހަގަކުރެއްވިއެވެ.