އަންނަ ޖަނަވަރީ މަހުން ފެށިގެން ސަރުކާރުގެ ހޮސްޕިޓަލް ތަކުން އާސަންދައިގެ ދަށުން އަހަރަކު ދެފަހަރު މެޑިކަލް ޗެކަޕް ހެދޭނެ ކަމަށް ސަރުކާރުން ބުނެފިއެވެ.
މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް އޮފީހުގެ އަންޑަ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުالله ހަލީލް ވިދާޅުވީ އާސަންދައިގެ ކުންފުނީގެ ދަށުން މިކަމަށް ހާއްސަ ޕެކޭޖުތަކެއް ތަންފީޒުކުރެވިގެން ދާނެ ކަމަށެވެ.
އާސަންދައިން މެޑިކަލް ޗެކަޕް ހެދުމަށް ތަންފީޒުކުރާ ޕެކޭޖް ތަކުގެ ތެރޭގައި ވަކި ވަކި އުމުރުފުރާ ތަކަށް އަމާޒުކުރެވޭ ޕެކޭޖް ތަކަކާއި އެކު މިމަސައްކަތް ފެށިގެން ދާނެ ކަމަށް ވެސް ފިރުޒުލް ވިދާޅުވިއެވެ.
އަދި އެ ޕެކޭޖް ތަކާއި ބެހޭ މަޢުލޫމާތު އަންނަ ހަފްތާގައި ޢާއްމު ކުރެވި އިޢުލާން ކުރެވިގެންދާނެ ކަމަށް ސަރުކާރުން ބުނެފައިވެއެވެ.
"2024 ވަނަ އަހަރުގެ ފުރަތަމަ ކުއާޓާއާއި ދެވަނަ ކުއާޓާގެ ކުރީ ކޮޅުން ފެށިގެން މި ޕެކޭޖްތައް ފުޅާކުރެވި ގިނަ ރައްޔިތުންނަށް ފޯރުކޮށްދެވޭނެ މަގަކަށް ސިޔާސަތުގައި ހުރި ޓައިމްލައިނާއި އެއްގޮތަށް މަސައްކަތްތައް ކުރެވިގެން ދާނެ"
ފިރުޒުލް ވިދާޅުވިއެވެ.
މީގެ އިތުރުންވެސް ފިރުޒުލް ވިދާޅުވީ އާސަންދަ ގަވާއިދަށް ގެނައި ބަދަލުުގައިވާ ގޮތުން ސްކީމުން ލިބޭ ހިދުމަތްތަކުގެ ތެރޭގައި، ދަރިން ނުލިބޭ މީހުން ދަރިން ހޯދުމަށް ކުރާ ފަރުވާ (އިންފާޓިލިޓީ)އާ ގުޅޭ ހިދުމަތްތައް އާންމުކޮށް ޝާއިއުކުރާ އުސޫލެއްގެ ދަށުން ފޯރުކޮށްދެވިގެން ދާނެ ކަމަށެވެ.
މިއަދު ބޭއްވުނު ނޫސްވެރިންގެ ބައްދަލުވުމަކީ ރައީސް ޑރ.މުޙައްމަދު މުއިއްޒުގެ ސަރުކާރަށް ހަތަރު ހަފުތާ ފުރުމާ ގުޅިގެން، މި މުއްދަތަށް ސަރުކާރުން ފުރިހަމަ ކުރަން ނިންމާފައިވާ ކަންތައްތައް ކުރިއަށްގެންދެވިފައިވާ މިންވަރު ހިއްސާކުރުމަށް ބޭއްވި ބައްދަލުވުމެކެވެ.
Advertisement
This content is created and paid for by advertisers and does not involve Voice Journalists
