ސަރުކާރުގެ ވުޒާރާތަކަށް މުވައްޒަފުން އިތުުރުކުރަމުންދަނީ އެ ވުޒާރާތަކުގެ މަސައްކަތުގެ ޒާތުންކަމަށް ރައީސް އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުالله ހަލީލް ވިދާޅުވެއްޖެއެވެ.
ފިރުޒުލް މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
އެގޮތުން ރިޔާސީ އިންތިޚާބުގެ ކެމްޕޭނުގެ ތެރޭގައި ސިޔާސީ މުވައްޒަފުން މަދުކުރައްވާނެ ކަމަށް ރައީސް ޑރ މުއިއްޒު ވިދާޅުވިނަމަވެސް ބައެއް ވުޒާރާތަކަށް ގިނަ އަދަދެއްގެ ސިޔާސީ ބޭފުޅުން އައްޔަންކުރައްވަނީ ކީއްވެތޯ ނޫސްވެރިއަކު ދެންނެވި ސުވާލަށް ޖަވާބު ދެއްވަމުން ފިރުޒުލް ވިދާޅުވީ ބައެއް ވުޒާރާތަކަށް އެ ވުޒާރާތަކުގެ މަސައްކަތުގެ ޒާތުން މުވައްޒަފުން އިތުރުކުރުމުގެ މަސައްކަތް ކުރެވެމުންދާކަމަށެވެ.
“ބައެއް ވުޒާރާތަކަށް އެވުޒާރާތަކުގެ މަސައްކަތުގެ ޒާތުން މުވައްޒަފުން އިތުރުކުރުމުގެ މަސައްކަތް ކުރެވެމުން މިދަނީ، ކަނޑައެޅިފައި އޮތް މެންޑޭޓާ އެހުރި ވަޢުދުތަކާއި ކުރަންޖެހޭ މަސައްކަތްތަކާއި އެކަންކަމުގެ ޑެލިވަރީއަށް ކުރަން ޖެހޭ ކަންކަން އެއާއި ގުޅިގެންދާހެން، އެފިޝަންސީ އަށް ފޯކަސް ކުރެވިގެން” ފިރުޒުލް ވިދާޅުވިއެވެ.
މީގެ އިތުރުން ފިރުޒުލް ވިދާޅުވީ މިހާތަނަށް ފެންނަން ހުރި ނަތީޖާތަކަށް ބަލާއިރު ސަރުކާރުގެ މަސައްކަތްތައް ބަރާބަރަށް ބާރަށް ކުރިއަށްދާކަމަށެވެ.
ފިރުޒުލް އިތުރަށް ވިދާޅުވީ ސިޔާސީ މަޤާމުތައް 700ގައި ކޮންޓްރޯލް ކުރައްވާނެ ކަމަށް ރައީސް ޑރ މުއިއްޒު ވިދާޅުވެފައިވާ ކަމަށެވެ. އަދި އެއީ ވޭތުވެދިޔަ ދެ ސަރުކާރަށްވުރެ ވެސް މަދު އަދަދެެއް ކަމަށް ރައީސް ވިދާޅުވެފައިވާ ކަމަށް ފިރުޒުލް ވިދާޅުވިއެވެ.
ހަމަ އެއާއެކު ސަރުކާރު އެކުލަވާލުމާއި ސަރުކާރުގެ ވުޒާރާތައް ބައްޓަން ކުރުމާއި އަދި ސިޔާސީ މަޤާމުތައް އެކުލަވާލުމުގައި ވެސް "އެފިޝަންސީ" އަށް ވަރަށްބޮޑަށް ފޯކަސްކުރައްވާނެ ކަމަށް ރައީސް ވިދާޅުވެފައިވާ ކަމަށް ފިރުޒުލް ވިދާޅުވިއެވެ.
"މާނައަކީ އެކަމަކަށް އަޅުގަނޑުމެން ހާސިލް ކުރަން މި ޖެހޭ މަސައްކަތްތައް ފުރިހަމައަށް މަސައްކަތްތައް ބައްޓަން ކުރާނެކަން” ފިރުޒުލް ވިދާޅުވިއެެވެ.
މިހާތަނަށް ސަރުކާރުގެ މަޤާމުތަކަށް ބޭފުޅުން އައްޔަންކުރެއްވައި ސަރުކާރު އެކުލަވައިލައްވައި އަދި ދައުލަތުގެ ވުޒާރާތަކަށް އޮނިގަނޑު އެކުލަަވާލެއްވުމާއި މިހުރިހާ ކަމެއްގައި ވެސް ރައީސްގެ ވިސްނުންފުޅު ގެންގުޅުއްވައިފައިވަނީ އެގޮތައް ކަމަށް ފިރުޒުލް ވިދާޅުވިއެވެ.
ރައީސް އޮފީހުގެ ޗީފް ސްޕޯކްސްޕާސަން މުޙައްމަދު ޝަހީބް ވިދާޅުވީ ސިޔާސީ މުވައްޒަފުން ނަންގަވާނެ ކަމަށް ރައީސް މުޢިއްޒު ވިދާޅުވި އަދަދުގެ 50 އިންސައްތައަށް ވެސް އަދި މުވައްޒަފުން ނެގިފައިނުވާ ކަމަށެވެ. އަދި މުވައްޒަފުން ނަގާ އިންސައްތައިގެ 20 އިންސައްތައަކީ އަންހެނުންކަމަށް ވެސް “ވޮއިސް” އަށް މަޢުލޫމާތު ދެއްވަމުން ޝަހީބު ވިދާޅުވިއެވެ. އަދި ރައީސްގެ ވަޢުދުފުޅާއި އެއްގޮތައް 700އަށް ވުރެ ގިނައިން ސިޔާސީ މުވައްޒިފުން ނުނަންގަވާނެ ކަމަށް ވެސް ޝަހީބު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
