މާލެ އާއި ހުޅުމާލެ ގުޅޭ ހައިވޭގައި ހުރި ސޯލާ ޕެނަލްތައް ނަގައި، އެހެން ތަނަކަށް ބަދަލުކުރެވޭނެތޯ ބެލުމުގެ މަސައްކަތް ކުރައްވަމުން ގެންދަވާކަމަށް މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ތާރިޤު އިބްރާހީމް ވިދާޅުވެއްޖެއެވެ.
އޭނާ މިފަދައިން ވިދާޅުވީ އެހެން މީޑިއާއެއްގައި ވާހަކަފުޅު ދައްކަވަމުންނެވެ.
ސޯލާ ޕެނަލްތައް ހުރީ ހަރުކޮށްނިމި، ކަރަންޓު ދޭން ތައްޔާރުވެފައި ކަމަށާއި މީގައި މައްސަލައަށް ދިމާމިވަނީ އެތަނުގެ ވިއު ގެއްލި އެކަމުގެ އުނދަގޫ ދަތުރު ކުރާ ފަރާތްތަކަށްވުން ކަމަށް ވެސް ތާރިޤު ވިދާޅުވިއެވެ.
"ރައީސްގެ ވައުދުފުޅެއް އެއީ އެތަން ނެގޭނެތޯ ބަލާފަ ކުރެވެން ހުރި ކަންތައްތައް ކުރަން. އެއީ މިދަންނަވާހެން ބޭރުގެ އިންވެސްޓްމަންޓެއް އެއީ. ވޯލްޑް ބޭންކާއި އެއްކޮށް ހެދިފައި އޮތް އެއްބަސްވުމެއް މިއީ. އެހެންވީމަ ކޮބާތޯ އަޅުގަނޑުމެންނަށް އެކަންތައްތައް ކުރެވޭނެ ގޮތަކީ ބެލުމުގެ މަސައްކަތް އަޅުގަނޑުމެން ކުރަމުން މިދަނީ މިހާރު. މަސައްކަތް ކުރަމުން މިދަނީ އެތަކެތި ރިލޮކޭޓް ކުރެވޭން ގޮތްތަކަކީ. އެކަންތައްތައް އަޅުގަނޑުމެން ކުރަމުން މިދަނީ."
ތާރިޤު ވިދާޅުވިއެވެ.
މީގެ އިތުރުން އެތަނުން ޖަނަރޭޓް ކުރާ ޕަވާ އަކީ 5.5 މެގަ ވޯޓުކަން ފާހަގަކުރައްވައި މިނިސްޓަރު ތާރިޤު ވިދާޅުވީ އެތަކެތި ހުރި ތަނުން އެހެން ތަނަކަށް ބަދަލުކޮށްފި ނަމަ މާލޭގެ ކަރަންޓު ޕަވާ ޖަނެރޭޝަނަށް އަންނާނެ ބަދަލުތަކަކީ ވެސް ކޮބައިތޯ ބަލަންޖެހޭކަމަށެވެ.
ވޭތުވެދިޔަ ފަސްއަހަރު ދުވަހުގެ ތެރޭގައި މާލޭގެ ޕަވާ ޖަނެރޭޝަނަކަށް އެހާ ބޮޑު ކުރިއެރުމެއް ލިބިފައިނުވުމުގެ ސަބަބުން މާލެ ސަރަހައްދުގައި ކަރަންޓުގެ ކެޕޭސިޓީ ދުވަހުން ދުވަހަށް ދަނީ ކުޑަވަމުންކަމުގައި ވެސް މިނިސްޓަރު ތާރިޤު ވިދާޅުވިއެވެ. އެހެންކަމުން މިހުރިހާ ކަމަކަށް ރިއާޔަތްކޮށް ސޯލާ ޕެނަލްތައް އެހެންތަނަކަށް ބަދަލުކުރުމުން ދިމާވާނެ މައްސަލަތަކާއި އެކަމަށް ހިނގާނެ ހަރަދު ބައްލަވަމުން ގެންދަވާކަމަށް ވެސް ވިދާޅުވިއެވެ.
ސޯލާ ޕެނަލް ހަރުކުރުމުގެ މަޝްރޫއަކީ ކުރީގެ ސަރުކާރުން ހިންގި މަޝްރޫއެކެވެ.
Advertisement
This content is created and paid for by advertisers and does not involve Voice Journalists
