ސަޢޫދީޢަރަބިއްޔާ އާއި އިރާން އާއި ދެމެދު އޮތް ގުޅުން ބަދަހި ކުުރުމަށް ޗައިނާގެ ބެއިޖިންގައި ވި އެއްބަސްވުން ތަންފީޒު ކުރުމަށް އެދެޤައުމުން އެއްބަސްވެއްޖެއެވެ.

މިއަހަރުގެ ކުރީ ކޮޅުގައި ވަނީ ޗައިނާގެ ބެއިޖީންގައި ވަނީ ތިން ޤައުމު އެކުގައި ބައްދަލުވުމެއް ބާއްވައިފައެވެ. މިބައްދަލުވުމުގައި ސަޢުދީ އާއި އިރާނުން ވަނީ ދެޤައުމުގެ ދެމެދުގައި ގުޅުން ބަދަހިކުރުމަށް އެއްބަސްވުމެއް ގައި ސޮއިކޮށްފައެވެ.

މިބައްދަލުމާއި ގުޅޭ ސިލްސިލާ ބައްދަލުވުމެއް ބެއިޖިންގައި ވަނީ ބާއްވައިފައެވެ.

Advertisement

ޗައިނާގެ ކޮމިއުނިސްޓް ޕާޓީގެ ސެންޓްރަލް ކޮމިޓީ ފޮރިން އެފެއާޒް ކޮމިޝަން އޮފީހުގެ ޑިރެކްޓަރު އަދި ފޮރިން މިނިސްޓަރު ވަންގް ޔީ ރިޔާސަތު ބެލެހެއްޓެވި މިބައްދަލުވުމުގައި، ސަޢޫދީއާއި އީރާނުގެ ވަފުދުތަކުގެ އިސްވެރިންނާއި ފޮރިން މިނިސްޓްރީގެ ޑެޕިއުޓީ މިނިސްޓަރުން ކަމަށްވާ ވަލީދު ބިން ޢަބްދުލްކަރީމް އަލް ޚުރައިޖީ އާއި ޢަލީ ބަގޭރީ ކާނީ ވަނީ ބައިވެރިވެވަޑައިގެންފައެވެ.

މި މަޝްވަރާތައް މައިގަނޑުގޮތެއްގައި ކުރިއަށްގެންދިޔައީ މިދިޔަ މާޗް މަހު ޗައިނާއިން އެއްބަސްވި ބެއިޖިން އެއްބަސްވުމާ ގުޅިގެން ސަޢޫދީ ޢަރަބިއްޔާއާ އީރާނާ ދެމެދު އޮތް ގުޅުން އިތުރަށް ބަދަހިކުރުމާ ބެހޭގޮތުންނެވެ.

މީގެ އިތުރުން ތެެހެރާންގައި ސަޢުދީގެ އެމްބަސީ އަލުން ޤާއިމް ކުރުމާއި ރިޔާޟްގައި އަލުން އިރާންގެ އެމްބަސީ ޤާއިމް ކުރުމާއި މެދު ވަނީ މަޝްވަރާ ކޮށްފައެވެ.

ތިން ޤައުމުން ކުރިއަށް ގެންދިޔަ ބައްދަލުވުމުގައި ޣައްޒާގައި ކުރެވެމުންދާ ހަނގުރާމަ އަށް އަލިއަޅުވައިލައި އެކަމުގައި ހުރި ކަންބޮޑުވުންތައް ހާމަކޮށްފައިވެއެެވެ.

އިރާން އާއި ސަޢުދީ އާއި ދެމެދު އޮތް ގުޅުން ކެނޑިގެން ގޮސްފައިވަނީ އިރާންގެ ތެހެރާން އާއި މަޝްހަދް ގައި ހުރި ސަޢުދީގެ އެމްބަސީތަކަށް 2016 ގައި ހަމަލާދިނުމާއި ގުޅިގެނެވެ.

ތިން ޤައުމުގެ ދެމެދުގައި އެންމެ ފަހުން ބޭއްވުނު ވާހަކަތަކުގައި2001 ގައި ސަޢުދީ އާއި އިރާން އާއި ދެމެދު ވެވިފައިއޮތް “ސެކިޔުރިޓީ ކޯޕަރޭޝަން” އެއްބަސްވުމަށް ޢަމަލު ކުރަން ފެށުމާއި އަދި 1998 ގައި ދެޤައުމުގެ ދެމެދުގައި ވެވުނު ވިޔަފާރިއާއި ގުޅޭ އެއްބަސްވުންތަކަަށް ޢަމަލު ކުރުމާއި މެދު މަޝްވަރާ ކުރެވިފައިވެއެވެ.

ތިން ޤައުމުގެ މެދުގައި ބޭއްވޭ ސުލްޙައިގެ ވާހަކަތައް ދެން އޮންނާނީ 2024 ވަނަ އަހަރުގެ ޖޫން މަހުގެ ތެރޭގައި ކަމަށް ޗައިނާއިން ވަނީ އިޢްލާނު ކޮށްފައެވެ.