2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި ޖުމްހޫރީ ޕާޓީގެ ފަރާތުން ވާދަކުރުމަށް ބޭނުންވާ ފަރާތްތަކަށް އެ ފުރުސަތު އެ ޕާޓީން ހުޅުވާލައިފިއެވެ. 

އެކަން ހާމަކޮށް އެ ޕާޓީން ކުރި އިއުލާނެއްގައި ބުނެފައި ވަނީ، ޕާޓީގެ އަސާސީ ގަވާއިދުގެ 51 ވަނަ މާއްދާގެ ދަށުން،  މަޖިލީހުގެ ހުރިހާ ދާއިރާއަކަށް ވެސް ކުރިމަތިލުމުގެ ފުރުސަތު މަޖިލީހުގެ މެމްބަރުންގެ ޝަރުތު ހަމަވާ އަދި އެކަމަށް ގާބިލު މީހުންނަށް ހުޅުވާލާފައިވާ ކަމަށެވެ. 

އެގޮތުން ކުރިމަތިލާ ފަރާތްތަކުގެ ކެނޑިޑެސީ ކަށަވަރު ކުރާނީ ޕާޓީގެ ކައުންސިލުން ނުވަތަ ކައުންސިލުން ކަނޑައަޅާ ހާއްސަ ކޮމެޓީއަކުންކަމުގައި އެ އިއުލާނުގައި ވަނީ ބުނެފައެވެ. 

ވުމާއެކު ޖުމްހޫރީ ޕާޓީގެ ޓިކެޓްގައި މަޖިލީހުގައި ވާދަޖުރަން ބޭނުންވާ ފަރާތްތަކުން މިމަހުގެ 26 ވަނަ ދުވަހުގެ 14:00ގެ ކުރިން، ކުރިމަތިލުމުގެ ފުރުސަތު އެ ޕާޓީން ވަނީ ހުޅުވާލާފައެވެ. 

މިހިނގާ 19 ވަނަ މަޖިލީހުގައި ޖޭޕީ ތަމްސީލު ކުރާ ތިއްބެވީ އެންމެ ދެ މެންބަރުންނެއެވެ. އެއީ އެޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހީމާއި ކެންދޫ ދާއިރާގެ މެންބަރު އަލީ ހުސައިނެވެ.

ކުރިޔަށް އޮތް 20 ވަނަ ރައްޔިތުން މަޖިލީހުގައި 93 ދާއިރާއެއް ހިމެނޭނެ އެވެ. މިހާރު ޕީޕީއެމް-ޕީއެންސީ އަދި އެމްޑީޕީން ވެސް ވަނީ ޕްރައިމަރީއަށް ހުޅުވާލާފަ އެވެ.