ރައީސް ޔާމިން މިނިވަން ކުރުމުގެ މަސައްކަތަށް މަގުމައްޗަށް ނުނިކުމެ ތިބެނީ މި ސަރުކާރުގެ އެދުމުގެ މަތިން ކަމަށާއި އެމަނިކުފާނު މިނިވަން ކުރުމުގެ މަސައްކަތަށް މަގުމައްޗަށް ނިކުންނަން ޖެހިއްޖެ ހާލަތެއްގައި އެކަން ކުރުމަށް ތައްޔާރަށް ތިބި ކަމުގައި ޕީއެންއެފްއިން ބުނެއްޖެއެވެ. 

އެ ޕާޓީގެ އޮފީހުގައި ރޭ އޮތް ޖަލްސާއެއްގައި ވާހަކަދައްކަވަމުން ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ވަނީ، ރައީސް ޔާމީނަށް މި ސަރުކާރުން އެއްވެސް ދުލެއް ނުދޭ ކަމަށް ވިދާޅުވެ އެމަނިކުފާނަށް ދުލެއް ނުދެވިގެން އުޅޭ ސަބަބާއި ގުޅޭ ގޮތުން ސުވާލު ކުރައްވައިފައެވެ. 

އެގޮތުން ރައީސް ޔާމިން ވަގުތުން ވަގުތަށް ދޫކޮށްލުމަށް ގޮވާލައި މަލީހުވަނީ އެމަނިކުފާނު މިނިވަން ކުރެއްވުމަށް ޖުމްހޫރީ މައިދާނަށް ނިކުންނަން ޖެހިއްޖެ ހާލަތެއްގައި އެކަންވެސް ކުރައްވާނެ ކަމަށް ވިދާޅުވެފައެވެ. 

ރައީސް މުއިއްޒުގެ ސަރުކާރު އުފެދުމާއެކު ޕީޕީއެމް/ޕީއެންސީގެ ލީޑަރޝިޕާ ހިޔާލު ތަފާތުވެ، ޔާމީން ވަނީ އެ ޕާޓީ ދޫކުރައްވައިފަ އެެވެ. ދަރިކަލުން ޒެއިން ޔާމީނުގެ މަސްއޫލުވެރިކަމުގައި އާ ޕާޓީއެއް އުފައްދަވަން މަސައްކަތް ފެށްޓެވީ އެހިސާބުންނެވެ.