ރައްޔިތުންގެ މަޖިލީހުގެ ހިނގަމުން މިދާ ދައުރު މި މަހުގެ 28 އާ ހަމައަށް ދަންމާލަން މަޖިލިހުން މިއަދު ފާސްކޮށްފިއެވެ.
މިއަދު ރައްޔިތުންގެ މަޖިލީހުގެ ޖަލްސާގައި މަޖިލީހުގެ ރައީސް މުހައްމަދު އަސްލަމް ވަނީ، ސަރުކާރުގެ ކެބިނެޓްގައި ހިމެނިވަޑައިގަންނަވާ މިނިސްޓަރުންނަށް ރުހުން ދިނުމުގެ މައްސަލަ ކުރިއަށްގެންދަވަން ކަމަށް ވިދާޅުވެ, ހިނގަމުން މިދާ ދައުރު ދަންމާލެއްވުމަށް ހުށަހަޅުއްވާފައެވެ.
އަސްލަމްގެ އެ ހުށަހެޅުއްވުމަށް މިއަދު ވޯޓަށް އަހާފައިވާއިރު، ވޯޓުގައި ބައިވެރިވެވަޑައިގެންނެވި 63 މެންބަރުންގެ އިއްތިފާގުން ވަނީ އެގޮތަށް ފާސްކޮށްފައެވެ.
މިއީ އެކި ސަބަބުތަކަށްޓަކައި ހިނގަމުންމިދާ މަޖިލީހުގެ ދައުރު ދަންމާލި ތިންވަނަ ފަހަރެވެ.
އެންމެ ފުރަތަމަ ދައުރު ދަންމާލީ، މިމަހު 7 ވަނަ ދުވަހަށެވެ. އެފަހަރު ދައުރު ދަންމާލީ ބަޖެޓުގެ މަސައްކަތް ހިމެނޭހެން މުހިއްމު ގިނަ މައްސަލަތަކެއް ހުރިކަން ފާހަގަކުރެއްވުމަށް ފަހުގައެވެ.
އެފަހުން، އަނެއްކާވެސް ދެވަނަ ފަހަރަށް ދައުރު ދަންމާލީ މިއަދުގެ ނިޔަލަށެވެ.
މަޖިލިހުގެ މި ދައުރު ދަންމާލަން ފާސްކޮށްފައިވާއިރު، މަޖިލިހުގެ ކުރީގެ ރައީސް މުހައްމަދު ނަޝީދާއި ކުރީގެ ނާއިބު ރައީސް އީވާ އަބްދުاللهގެ އިތުބާރު ނެތްކަމުގެ މައްސަލާގައި މަޖިލީހުގެ މަސައްކަތެއް ނުކުރެވި ގިނަ ދުވަސްތަކެއް ވަނީ ބޭކާރުވެގެން ގޮސްފައެވެ.
Advertisement
This content is created and paid for by advertisers and does not involve Voice Journalists
