ޗައިނާގެ ގަންސޫ ޕްރޮވިންސަށް ކުރިމަތިވި ބިންހެލުމާގުޅިގެން އެތައްބަޔަކު މަރުވެ، އެތައްބަޔަކު ޒަޚަމްވެ އަދި އެތައްބަޔަކަށް އަސަރުކޮށް ކުރިމަތިވެފައިވާ ހާދިސާއާ ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޗައިނާގެ ރައީސް ޝީ ޖިންޕިންއަށް ތަޢުޒިޔާގެ މެސެޖެއް ފޮނުއްވައިފި އެވެ.

ރައީސުލްޖުމްހޫރިއްޔާގެ މެސެޖުގައި މި ހާދިސާގެ ޚަބަރު އެއްސެވީ ފުންހިތާމައާއެކުކަން ފާހަގަކުރައްވައި ހިތާމައިގެ މި ދަނޑިވަޅުގައި، ދިވެހި ސަރުކާރާއި ރައްޔިތުންނާއި، ރައީސުލްޖުމްހޫރިއްޔާގެ އަމިއްލަ ނަންފުޅުގައި، ޗައިނާގެ ރައީސާއި، ސަރުކާރަށާއި، ރައްޔިތުންނަށާއި، ޚާއްޞަކޮށް މަރުވި މީހުންގެ ޢާއިލާތަކަށް އިޚްލާޞްތެރިކަމާއެކު ހަމްދަރުދީ ފޮނުއްވި އެވެ.

ރައީސުލްޖުމްހޫރިއްޔާގެ މެސެޖު ނިންމަވާލެއްވީ މި ޙާދިސާގެ ސަބަބުން ލިބުނު ގެއްލުންތަކުން އަރައިގަތުމަށް ކުރެވެމުންދާ މަސައްކަތުގައި ކާމިޔާބީއަށް އެދިވަޑައިގަންނަވަމުންނެވެ.

Advertisement

ޗައިނާގެ ހުޅަނގު އުތުރުގައި އޮންނަ ފަރުބަދަމަތީ ގަންސޫ ޕްރޮވިންސުގެ ޖިޝިޝާން އަވަށަށް އައި ބާރުގަދަ ބިންހެލުމާއި ގުޅިގެން މަރުވި މީހުންގެ އަދަދު މިހާރު ވަނީ 111 އަށް އަރާފައެވެ. 

އޭގެ އިތުރުން އެ ހާދިސާގައި 230 އަށް ވުރެ ގިނަ މީހުންނަށް އެކިވަރުގެ އަނިޔާތައް ލިބި ޒަޚަމްވެފައިވާކަން އެ ގައުމުން ވަނީ ރިޕޯޓުކޮށްފަ އެވެ. 

ޗައިނާގެ ބިންހެލުންތަކާ ބެހޭ މަރުކަޒުން ބުނީ ރޭ ދަންވަރު އައި އެ ބިންހެލުމަކީ ރިކްޓަރ މިންގަނޑުން 5.9ގެ ބާރުމިނުގައި 10 ކިލޯމީޓަރު އަޑިން އައި ބިންހެލުމެކެވެ.

އެ ބިންހެލުމުގެ ސަބަބުން ބިމާ ހަމަވެފައިވާ ޢިމާރާތްތަކުގެ ދަށުގައި ތިބި މީހުން ސަލާމަތްކުރުމުގެ މަސައްކަތް އަންނަނީ ކުރަމުންނެވެ.