ފަންނުވެރިކަމުގެ ދާއިރާއަށް ދިމާވެފައިވާ ދަތިތައް ހައްލުކުރުމަށާއި އައު ވިސްނުންތަކަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފުރުސަތު ދެއްވާނެ ކަމަށް އުންމީދު ކުރާ ކުމަށް މަޝްހޫރު ލަވަކިޔުންތެރިޔާ ޝަލަބީ އިބްރާހީމް ބުނެފިއެވެ.

ޝަލަބީ މިފަދައިން ބުނީ މިނިސްޓްރީ އޮފް ޔޫތު އެމްޕަވާމެންޓް, އިންފޮމޭޝަން އެންޑް އާޓްސްގެ ޑެޕިއުޓީ މިނިސްޓަރުގެ މަގާމަށް މުހައްމަދު އަސީލް އައްޔަންކުރެއްވުމާއި ގުޅިގެން މަރުހަބާ ކިޔާ އެކްސްގައި ކުރި ޕޯސްޓެއްގައެވެ.

ޝަލަބީ ބުނީ އަސީލް މި މަގާމަށް އައްޔަންކުރެއްވުމަކީ ރައީސް ޑރ.މުއިއްޒުގެ ވަރަށް ރަނގަޅު ނިންމެވުމެއް ކަމަށެވެ. 

Advertisement

އަދި އޭނާގެ އެންމެ މުހިންމު އެއް އެދުމަކީ ސަރުކާރާ ގާތުން ފަންނުވެރީންނަށް މަސައްކަތްތަކެއް ކުރެވޭނެ އިންތިޒާމްތަކެއް ހަމަޖައްސައިދިނުންކަމުގައި ވެސް ޝަލަބީ ވަނީ ބުނެފައެވެ.

ޒުވާނުންނާއި ފަންނިއްޔާތު ކުރިއެރުވުމަކީ ރައީސް ޑރ.މުއިއްޒުގެ ރިޔާސީ ވައުދުފުޅެކެވެ. މިގޮތުން ތަފާތު ދާއިރާތަކުން ޒުވާނުން ކުރިއަށް ދިއުމަށް ބޭނުންވާ ހާއްސަ ޕްލޭނެއް އެކުލަވާލުމަށް އެމަނިކުފާނުގެ ހަފްތާ 14 މަގު ޗާޓުގައި ވެސް ވަނީ ހިމަނުއްވާފައެވެ.