ސައުދީ އަރަބިއްޔާގައި މިހާރު ކުރިއަށްދާ ފީފާ ކުލަބު ވޯލްޑްކަޕް ފުޓްބޯޅަ މުބާރާތުގެ ސެމީ ފައިނަލުގެ ދެވަނަ މެޗުގައި އޭޝިއާގެ ޗެންޕިއަން ޖަޕާނުގެ އުރަވާ ރެޑްސް 3-0 ގެ ނަތީޖާއަކުން ބަލިކޮށް ޔޫރަޕުގެ ޗެމްޕިއަން މެންޗެސްޓާ ސިޓީ އިން މުބާރަތުގެ ފައިނަލުން ޖާގަ ހޯދައިފި އެވެ.

ޖިއްދާގެ ކިންގް އަބްދުﷲ ސްޕޯޓްސް ސިޓީގައި ކުޅެވުނު މިމެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓުކުރީ މެންޗެސްޓާ ސިޓީ އިންނެވެ. އަދި މިހާފުގައި އެޓީމުން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. އަދި މިހާފުގައި ސިޓީގެ ގޯލާއި އަމާޒުކޮށް އުރަވާ ރެޑްސް އަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.

މިމެޗުގައި މެންޗެސްޓާ ސިޓީ އިން ލީޑު ހޯދީ ފުރަތަމަ ހާފުގެ އިތުރު ވަގުތުގެ ތެރޭގައެވެ. މިއީ އުރަވާ ރެޑްސްގެ ނޯވޭ ޑިފެންޑަރު މާރިއަސް ހޮއިބްރޭޓެން އަތުން ބައިކޮޅަށް ވަން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން މެންޗެސްޓާ ސިޓީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ސިޓީ އިން އިތުރު ދެލަނޑު ކާމިޔާބު ކުރި އިރު، މިމެޗުގައި އެޓީމުން ކާމިޔާބުކުރި ދެވަނަ ލަނޑު ދެވަނަ ހާފުގެ 52 ވަނަ މިނެޓުގައި ކާމިޔާބުކޮށްދިނީ ކްރޮއޭޝިޔާގެ މިޑްފީލްޑަރު މަޓެއޯ ކޮވަސިކް އެވެ. މިއީ އެޓީމުގެ އިގިރޭސި ޑިފެންޑަރު ކައިލް ވޯކާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސިޓީގެ ތިންވަނަ ލަނޑު ދެވަނަ ހާފުގެ 59 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕޯޗުގަލް މިޑްފިލްޑަރު ބެނާޑޯ ސިލްވާ އެވެ. މީގެ އިތުރުން ވެސް މިހާފުގައި ސިޓީއިން ގިނަ ފުރުސަތުތަކެއް ތަނަވަސްކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 3-0 ގެ ނަތީޖާއަކުން މެންޗެސްޓާ ސިޓީ ކުރީގައި އޮވެގެންނެވެ.

މިމުބާރާތުގެ ފައިނަލް މެޗުގައި މިމަހުގެ 22 ވަނަ ދުވަހުގެ ރޭ ރާއްޖޭ ގަޑިން 23:00 މެންޗެސްޓާ ސިޓީ ނުކުންނާނީ ކޮޕާ ލިބަޓަޑޯރެސްގެ ޗެންޕިއަން ބްރެޒިލްގެ ފްލުމިނޭންސް އާއި ދެކޮޅަށެވެ. ފްލުމިނޭންސް އިން ފައިނަލުގެ ޖާގައެއް ހޯދީ ސެމީ ފައިނަލުގައި އެފްރިކާގެ ޗެންޕިއަން މިސްރުގެ އަލް އަހުލީ ބަލިކުރުމަށްފަހު އެވެ.