ޕާސްޕޯޓު ދޫކުރުމުގައި އައިޑީ ކާޑު ގެންނަން ނުޖެހޭގޮތަށް ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ހަމަޖައްސަވައިފިއެވެ.

މިކަމާ ގުޅިގެން މިއަދު އިމިގްރޭޝަނުން ނެރުނު ނޫސްބަޔާނުގައި ވަނީ އިލެކްޓްރޯނިކް ޕާސްޕޯޓާއި ހަވާލުވުމަށް ވެރިފަރާތުން ހާޒިރުވާނަމަ މިހާރު އައިޑީ ކާޑު ގެނައުން ލާޒިމް ނުވާނެ ކަމަށެވެ. އަދި 18 އަހަރުނުވާ ކުދިންގެ ބެލެނިވެރިން ކުދިންނާއެކު ޕާސްޕޯޓާ ހަވާލުވުމަށް އަންނައިރު، އެ ފަރާތްތަކުގެ އައިޑީ ކާޑުގެ ފޮޓޯއެއް ދެއްކުމުން އައިޑީ ކާޑު ވެރިފައިކޮށްދޭނެ ކަމަށެވެ.

އިތުރަަށް އިމިގްރޭޝަނުން ބުނީ ނޮން-އިލެކްޓްރޯނިކް އަދި އެމަޖެންސީ ޕާސްޕޯޓު ދޫކުރުމުގައި ވެސް ވެރިފަރާތުން ޕާސްޕޯޓާއި ހަވާލުވާނަމަ އައިޑީ ކާޑު ގެނައުން ލާޒިމެއް ނުވާނެ ކަމަށެވެ. އެހެންނަމަވެސް މަގުބޫލު އުޒުރެއް އޮވެގެން އެހެން ފަރާތަކުން ޕާސްޕޯޓާއި ހަވާލުވާނަމަ އިގުރާރު ސިޓީގައި އެ ފަރާތެއްގެ އައިޑީ ކާޑުގެ ސިރީއަލް ނަންބަރު ޖަހަންޖެހޭން ކަމަށެވެ. އެއަށްފަހު ޕާސްޕޯޓާއި ހަވާލުވާއިރު އެ ފަރާތެއްގެ އައިޑީ ކާޑުގެ ފޮޓޯއެއް ދެއްކުމުން އިމިގްރޭޝަނުން ވެރިފައިކޮށްދޭނެ ކަމަށެވެ.

Advertisement

ދާދި ފަހުން އައްޑޫ، ފުވައްމުލައް އަދި ކުޅުދުއްފުށި ސިޓީ އަދި ތިނަދޫގައި ގާއިމްކުރެވިފައިވާ އިމިގްރޭޝަންގެ ރީޖަނަލް އޮފީސްތަކުން މިހާރަށްވުރެ ދެގުނަ އަވަސްކޮށް ޕާސްޕޯޓު ލިބޭނެ އިންތިޒާމް ވެސް ވަނީ ހަމަޖައްސާފައެވެ.