ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ލީޑަރޝިޕްގެ އެންމެ ފާހަގަކުރެވޭ އެއް ސިފަފުޅަކީ ތަފާތު ވިސްނުންފުޅުގެ ބޭފުޅުންގެ ޚިޔާލުފުޅާއި މަޝްވަރާއާ އެކު ޤައުމު ބިނާކުރެއްވުމުގެ މަސައްކަތްޕުޅުގައި ހޯއްދަވައި، އެ ބޭފުޅުންގެ ބައިވެރިވުމާ އެކު ކުރިއަށް ވަޑައިގަތުމުގެ ސިފަފުޅުކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.

ޝިޔާމް މިފަދައިން ވިދާޅުވީ ބައެއް ސިޔާސީ ޕާޓީތަކުގެ އިސްވެރިންނާއި ރައީސް ޑރ.މުއިއްޒު ބައްދަލުކުރެއްވުމާއި ގުޅިގެންނެވެ.

ރައީސް ޑރ.މުއިއްޒު ވަނީ މިއަދު ބައެއް ސިޔާސީ ޕާޓީތަކުގެ ވެރިންނާއި ބައްދަލުކުރައްވާފައެވެ. މިއަދު ރައީސް ބައްދަލުކުރެއްވި ބޭފުޅުންނަކީ ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމާއި މޯލްޑިވްސް ޑިވޮލޮޕްމަންޓް އެލަޔަންސް (އެމްޑީއޭ) ގެ ރައީސް އަދި ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަޙްމަދު ޞިޔާމް މުޙައްމަދާއި މޯލްޑިވްސް ނޭޝަނަލް ޕާޓީގެ ރައީސް އަދި ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު ކާނަލް (ރިޓަޔާޑް) މުޙައްމަދު ނާޒިމްއާއި ޑިމޮކްރެޓްސްގެ ރައީސް އަލްއުސްތާޛް ހަސަން ލަތީފެވެ.

ރައީސް އޮފީހުން ބުނީ މި ބައްދަލުވުންތަކުގައި މައިގަނޑު ގޮތެއްގައި މަޝްވަރާކުރެވުނީ ޤައުމުގެ ކަންކަން ކުރިއަށްގެންދިއުމުގައި އެންމެން ގުޅިގެން ރައްޔިތުންގެ ފައިދާއާއި ލާބައަށް މަސައްކަތްކުރުމުގެ މުހިންމުކަމުގެ މައްޗަށް ކަމަށެވެ.

މި ބައްދަލުކުރެއްވުމުގައި ރައީސް ޑރ. މުއިއްޒު ވަނީ ސަރުކާރު ހިންގެވުމުގައި ސިޔާސީ ހުރިހާ ފަރާތްތަކެއްގެ ޚިޔާލާއި މަޝްވަރާ ވަރަށް މުހިންމުކަމަށާއި މިފަދަ އިތުރު ބައްދަލުވުންތައް ކުރިމަގުގައި ބާއްވަވާނެކަމުގައި ވިދާޅުވެފައެވެ.