ރަސްމާލެ މަޝްރޫޢު ކުރިއަށްދަނީ ދިވެހި ދައުލަތުގެ ބަޖެޓުން އެއްވެސް ޚަރަދެއްކުރަން ނުޖެހޭގޮތަށް ކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ. 

އެމަނިކުފާނު މިފަދައިން ވިދާޅުވީ މިރޭ ބޭއްވި ކަންގަތިކޮލި އެވޯޑް 2023 ރަސްމިއްޔާގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ ރިޔާސީ އިންތިޚާބުގެ ކެމްޕޭނުގެ ތެރެއިން ވަކިޕާޓީއެއްގެ ތަފާތު ނެތި، އެންމެ ގިނަ ދިވެހި ރައްޔިތުން އެ މަނިކުފާނާ ހިއްސާކުރެއްވި އެއް ވާހަކައަކީ ބޯހިޔާވަހިކަމުގެ ވާހަކަ ކަމަށެވެ. ކުދިކުދި ގޮޅިގޮޅީގައި ތިންހަތަރު ކުދިން ގޮވައިގެން ނިދައި ކައިބޮއި ހެދުމުގެ ތަކުލީފާއި އެ ދިރިއުޅުމުގެ އަރާމެއްނެތި އަބަދާއަބަދުކުރެވޭ ނިކަމެތި ހިތްދަތި އިޙްސާސްތަކުގެ ވާހަކަ ކަމަށެވެ.

އެގޮތުން ރައްޔިތުންގެ އެ އިޙްސާސްތަކުގެ ވާހަކަތައް އަޑުއެއްސެވުމަށްފަހު،   ލޮބުވެތި ރައްޔިތުންނަށް ޓަކައި، ރަސްމާލެ ހިއްކުމުގެ ބިޔަ މަޝްރޫޢެއް ވެރިކަމުގެ ފުރަތަމަ 14 ހަފުތާގެތެރޭގައި ފައްޓަވަން ނިންމެވީ ކަމުގައި ރައީސް ވިދާޅުވިއެވެ.

ރައީސް ވިދާޅުވީ ރަސްމާލެ ވާނީ ދުނިޔޭގައި ވެސް ނަންވިދާލާ ނަމޫނާ ސިޓީއަކަށް ކަމަށާއި ރަސްމާލެ ބިނާކުރައްވަނީ ތިމާވެށްޓާ ރައްޓެހި، ޒަމާނީ، ޑިޖިޓަލް، ސްމާޓު ސިޓީއެއްގެ ގޮތުގައި ކަމަށެވެ. އެހެންކަމުން މި ފެށެނީ ދިވެހީންގެ ރަށްވެހިކަމުގެ މުޅިން އައު ޒަމާނެއް ކަމަށާއި މިއީ މުޅީން އެހެން ފެންވަރެއް ކަމަށް ރައީސް ޑރ. މުޢިއްޒު ވިދާޅުވިއެވެ. 

މީގެއިތުރުން ރައީސް ވިދާޅުވީ މި ފަސް އަހަރު ނިމޭ އިރު، އެއްވެސް ދިވެހި ރައްޔިތަކު ގެދޮރުވެރިކަން ނެތިގެން ހިތާމައާއި ދެރަކަން އުފުލާކަށް ނުޖެހޭނެކަމަށެވެ.

ރައީސް ޑރ. މުޢިއްޒު ވިދާޅުވީ ރަސްމާލެއާއި ގުޅިފަޅަށް އިތުރުކުރެވޭ ބޮޑު ބިމާއި، ގިރާވަރު ފަޅުން އިތުރަށް ހިއްކައި އިތުރުކުރެވޭ ބޮޑު ބިމާއި މިހާރު އޮތް ހުޅުމާލެއާއެކު ދިވެހީންގެ ގެދޮރުވެރިކަމުގެ ޒަމާންވީން ހިތްދަތިކަމަށް ދާއިމީ ހައްލެއް ލިބޭނެ ކަމަށެވެ. އަދި އެމަނިކުފާނުގެ ސަރުކާރުގެ މި ފަސް އަހަރު ތެރޭގައި ރާއްޖޭގެ އެކި ކަންކޮޅުތަކުގައި ހިންގޭ އެކި މަޝްރޫޢުތަކުން މުޅި ރާއްޖެއަށް ގެދޮރުވެރިކަމުގެ މައްސަލަ ދާއިމަށް ހައްލުކޮށްދެއްވާނެ ކަމަށް ވެސް ރައީސް ޑރ. ިމުޢިއްޒު ވިދާޅުވިއެވެ. 

ފުށިދިއްގަރު ފަޅަކީ ރައީސްގެ ބޯހިޔާވަހިކަމުގެ "ޓޯޓަލް ސޮލިއުޝަން"ގެ ސިޔާސަތުގެ ދަށުން އެންމެ ބޮޑު އިސްކަމެއް ދީގެން ތަރައްގީކުރަން ނިންމާފައިވާ ތަނަށްވާއިރު، މި ވެރިކަމުގެ ފުރަތަމަ 100 ދުވަސް ތެރޭ އެ ފަޅު ހިއްކުމުގެ މަސައްކަތްކުރަން ހިމަނައި އެކަން ވަނީ ފަށައިފަ އެވެ.

މި މަޝްރޫޢުގެ ދަށުން ހިއްކާ ބިމުން 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުގެ ޕްލޭނުގައި ވަނީ ހިމަނާފައެވެ. އަދި އެ މަސައްކަތުގެ ތެރެއިން ގާތްގަނޑަކަށް، 75،000 އާއިލާއަކަށް ބޯހިޔާވަހިކަން ކަށަވަރުވެގެންދާނެ ކަމަށް ޕްލޭނިންގ މިނިސްޓްރީން ވަނީ ބުނެފައެވެ.