އިގިރޭސި ލީގު ކަޕްގެ ކުއާޓާ ފައިނަލުގައި ރޭ އަމިއްލަ ދަނޑުގައި 5-1 ގެ ނަތީޖާއަކުން ވެސްޓްހަމް ބަލިކޮށް ލިވަޕޫލުން މުބާރާތުގެ ސެމީ ފައިނަލުން ޖާގަ ހޯދައިފި އެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ލިވަޕޫލުން މެޗު ޑޮމިނޭޓުކުރި އިރު މި ހާފުގައި އެޓީމުން ވަނީ ލަނޑުޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން ފުރަތަމަ 15 މިނެޓް ތެރޭގައި އެޓީމުގެ މިޑްފިލްޑަރު ހާވީ އެލިއޮޓް ޢަށް ލިބުނު ހުސް ދެ ފުރުސަތުގެ ބޭނުން ނުކުރެވި ދިޔައިރު، އެޓީމުން މެޗުގެ ލީޑު ނެގީ ފުރަތަމަ ހާފުގެ 28 ވަނަ މިނެޓުގައެވެ.

މިލަނޑު އެޓީމަށް ކާމިޔާބުކޮށްދިނީ ހަންގޭރީގެ މިޑްފީލްޑަރު ޑޮމެނިކް ސޮބޮސްލައި އެވެ. މިއީ އެޓީމުގެ ޒުވާން ޑިފެންޑަ ރުޖެރެލް ކުއާންސާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.

Advertisement

މެޗުގެ ދެވަަނަ ހާފުގައި ލިވަޕޫލުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ މިހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ. އެގޮތުން އެޓީމުގެ މިޑްފިލްޑަރު ކާޓިސް ޖޯންސް ދެލަނޑު ކާމިޔާބު ކުރި އިރު، ނެދަލޭންޑްސްގެ ފޯވާޑް ކޯޑީ ގައްޕޯ އަދި މުހައްމަދު ސަލާހް މިއިން ކޮންމެ ކުޅުންތެރިއެއް ވަނީ މިހާފުގައި އެއް ލަނޑު ކާމިޔާބުކޮށްފައެވެ.

މިމެޗުގައި ވެސްޓްހަމް އިން ކާމިޔާބުކުރި ހަމައެކަނި ލަނޑު ދެވަނަ ހާފުގެ 77 ވަނަ މިނެޓުގައި ކާމިޔާބުކޮށްދިނީ އެޓީމުގެ އިގިރޭސި ފޯވާޑް ޖެރޮޑް ބޮވެން އެވެ. މިއާއެކު މެޗުގެ ކުޅުން ނިމިގެންދިޔައީ 5-1 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.

މުބަރަތުގެ ސެމީ ފައިނަލުގެ ދެވަނަ މެޗުގައި ލިވަޕޫލުން ނުކުންނާނީ ފުލަމް އާއި ދެކޮޅަށެވެ. މިދެޓީމުގެ މެޗުގައި ކުޅެވޭ ސެމީފައިނަލްގެ ފުރަތަަމަ ލެގް ޖެނުއަރީ މަހުގެ 9 ވަނަ ދުވަހު ލިވަޕޫލުގެ ދަނޑުގައި ކުޅުމަށް ހަމަޖެހިފައިވާއިރު، ދެވަނަ ލެގް ޖެނުއަރީ މަހުގެ 23 ވަނަ ދުވަހު ކުޅުމަށް ހަމަޖެހިފައިވަނީ ފުލަމްގެ ދަނޑުގައެވެ.

މިމުބާރަތުގެ ސެމީ ފައިނަލުގެ ފުރަތަމަ މެޗުގައި ވާދަކުރަނީ ޗެލްސީ އަދި މިޑުލްސްބަރާ އެވެ. މިދެޓީމުގެ މެދުގައި ކުޅެވޭ ފުރަތަަމަ ލެގުގެ މެޗު މިޑުލްސްބަރާގެ ދަނޑުގައި ޖެނުއަރީމަހުގެ 9 ވަނަ ދުވަހު ކުޅުމަށް ހަމަޖެހިފައިވާއިރު ދެވަނަ ލެގްް ޗެލްސީގެ ދަނޑުގައި ކުޅޭނީ ޖެނުއަރީމަހުގެ 23 ވަނަ ދުވަހު އެވެ.