މަރުގެ ހުކުމް ތަންފީޒުކުރުމަކީ ގައުމީ ތަރައްގީގެ ލަނޑުދަނޑިއެއް ނޫން ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވުމާއި ގުޅިގެން، މަޝްހޫރު ދީނީ ޢިލްމުވެރިޔާ އަދި ޖަމިއްޔަތުއް ސަލަފްގެ ރައީސް އައްޝައިޚް އަބްދުالله ބިން މުހައްމަދު އެމަނިކުފާނަށް ވަރުގަދަ ރައްދެއް ދެއްވައިފި އެވެ.
އެގޮތުން، މައުމޫނަށް ރައްދު ދެއްވައި ޝެއިޚް އަބްދުالله ކުރެއްވި ޓްވީޓެއްގައި ވިދާޅުވީ، ކީރިތި ޤުރްއާނަކީ އިންސާނުން ތަހުޒީބުކޮށް ދުނިޔެ އަމާންކޮށް, ނަފްސުތައް ތާހިރުކޮށްދިނުމަށް މާތް الله ބާވައިލެއްވި ފޮތް ކަމަށެވެ.
އަދި ޤުރުޢާނަށް އީމާންނުވާ މީހަކަށް ހެވެއް ނެތް ކަމީ ވަރަށް ސާފުކޮށް އެނގެން އޮތް ކަމެއް ކަަމަށް ވެސް ޝެއިޚް ވިދާޅުވި އެވެ.
ބައެއް މީހުން ޤުރްއާން ކިޔަވާން ދަތަސް އެއަށް އީމާންނުވެ ތިބޭކަން އެމީހުންގެ ވާހަކަތަކުން ހާމަވެގެން ދެއެވެ.
އައްޝައިޚް އަބްދުالله ބިން މުހައްމަދު
މި ސަރުކާރުން މަރުގެ ޙުކުމް ތަންފީޛު ކުރާނެ ކަމަށް ބުނުމުން އެކަމާއި ދެކޮޅަށް ރައީސް މައުމޫން ކުރެއްވި ޕޯސްޓަށް ރައްދު ދެއްވައި ޝެއިޚް ޝަފީޢު އަބްދުالله ވެސް ވަނީ ޕޯސްޓެއް ކުރައްވާފައެވެ.
އެގޮތުން ޝެއިޚް ފޭސްބުކް ގައި ކުރެއްވި ޕޯސްޓެއްގައި ވަނީ، މައުމޫންގެ ޒަމާނުން ފެށިގެން މަރަށް މަރު ނުހިފާ ހުއްޓާ މިހާރު މީހެއްގެ މަރަކީ މަދިރިއެއްގެ މަރާ އެއްފަދަ ކަމަކަށް ވެއްޖެ ކަމަށް ވިދާޅުވެފައެވެ.
މިއަށް ވުރެ ބޮޑަށް ތަރައްޤީއަށް އޮތް އިތުރު ހުރަހެއް ނެތެވެ. އެހެން ނޫނަސް މަރަށް މަރަކީ އިލާހީ ޙުކުމްފުޅެކެވެ. އެ ކަމަށް މުއުމިނަކު އިންކާރެއް ނުކުރާނެއެވެ.
ޝެއިޚް ޝަފީޢު އަބްދުالله
ރާއްޖޭގެ ޝަރުޢީ ނިޒާމުގައި މަރުގެ ހުކުމް އިއްވި ނަމަވެސް މިހާތަނަށް އެ ހުކުމް އެއްވެސް ސަރުކާރެއްގައި ތަންފީޒްކޮށްފައެއް ނުވެއެވެ.
ކުރީގެ ރައީސް އަބްދުالله ޔާމީން އަބްދުލްގައްޔޫމުގެ ވެރިކަމުގައި، ހޯމް މިނިސްޓަރު ކަމުގައި އުމަރު ނަސީރު ހުންނެވި އިރު މަރުގެ އަދަބު ތަންފީޒުކުރަން ބައެއް މަސައްކަތްތައް ކޮށްފައިވީ ނަމަވެސް، މަރުގެ އަދަބު ދީފައެއްނުވެއެވެ.
އެފަހުން އައި ރައީސް އިބްރާހިމް މުހައްމަދު ޞާލިހުގެ ސަރުކާރުން ވާހަކަ ދައްކަމުން ދިޔައީ ރާއްޖޭގެ ޝަރްޢީ ނިޒާމް އޮތް ގޮތުން މަރަށް މަރު ހިފެން ނެތް ކަމަށް ބުނެއެވެ.
މިވަގުތުވެސް މަރުގެ ހުކުމް އިއްވާފައިވާ 4 މީހަކު އެބަތިއްބެވެ.
Advertisement
This content is created and paid for by advertisers and does not involve Voice Journalists
