ސަރުކާރުގެ އަމާޒަކީ ފަސް އަހަރުގެ ދުވަހުގެ ތެރޭގައި އެތަނުގައި ރަސްމާލެ ތަރައްޤީކޮށް އާބާދުކުރުން ކަމުގައި އާބަންކޯގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.

ފުށިދިއްގަރުފަޅު ހިއްކުމުގެ މަޝްރޫއާ ގުޅޭގޮތުން ނޫސްވެރިންނަަށް މައުލޫމާތު ދެއްވަމުން ފަޒުލް ވިދާޅުވީ، މި ސަރުކާރުގެ އަމާޒަކީ ފަސް އަހަރުގެ ދުވަހުގެ ތެރޭގައި ރަސްމާލެ ތަރައްޤީކޮށް އާބާދުކުރުން ކަމުގައިވުމުން، އާބަންކޯއިން މަސައްކަތް ކުރަމުން ދަނީ އެ އަމާޒުގައި ކަމަށެވެ. އަދި އެ އަމާޒު ހާސިލްކުރެވޭތޯ އެ ކުންފުންޏާއި ކުންފުނީގެ ހުރިހާ މުވައްޒަފުން މަސައްކަތް ކުރަމުންދާ ކަމަށް ފަޒުލް ވިދާޅުވިއެވެ.

މީގެ އިތުރުން ފަޒުލް ވަނީ ފުށިދިއްގަރުފަޅު ހިއްކުމުގެ މަޝްރޫއުގައި ގާނޫނާއި ގަވާއިދާއި ޚިލާފަށް ކަންތައްތަކެއް ހިނގާފައިވާ ކަމަށް ދެކެވޭ ވާހަކަތަކަށް ވެސް ރައްދު ދެއްވާފައެވެ.

Advertisement

އެގޮތުން ފުށިދިއްގަރުފަޅު ހިއްކާ ރަސްމާލެ ތަރައްގީކުރުމުގެ މަޝްރޫއުގެ ދަށުން ގާނޫނާއި ގަވާއިދާ ޚިލާފުކަމެއް ހިނގާފައި ނުވާނެކަމުގެ ޔަގީންކަން ރައްޔިތުންނަށް އަރުވާކަމަށާއި އެފަދަ ކަމެއް ހިނގާފައިވާ ކަމަށް ގަބޫލުނުކުރައްވާ ކަމުގައި ވިދާޅުވިއެވެ.

އަދި މި މަޝްރޫއުގައި ގާނޫނާއި ގަވައިދާ ޚިލާފުކަމެއް އޮތް ކަމަށް ގަބޫލުކުރެވޭނަމަ، އޭސީސީއަށް މައްސަލަ ހުށަހެޅުމުގެ ފުރުސަތު އޮންނާނެކަމަށް ވެސް އޭނާ ވިދާޅުވިއެވެ. 

ފުށިދިއްގަރު ފަޅުން ހުޅުމާލެ ދެފިޔަވަހި އެއްކޮށްލީމަ ވާވަރުގެ ތިން ގުނަ ސަރަހައްދެއް ލިބިގެންދާނެއެވެ.

ފުށިދިއްގަރުފަޅު ހިއްކަނީ އެބިން ހިއްކާ ކުންފުނިކަމަށްވާ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އަށް 70 ހެކްޓަރުގެ ބިން ބަދަލުގެ ގޮތުގައި ދީގެންކަމަށް ފަޒުލް ވަނީ ވިދާޅުވެފައެވެ.