ރަސްމާލެ ތަރައްޤީކުރަން ބިން ހިއްކާ މަސައްކަތައް ދައުލަތުގެ ބަޖެޓުން އަދި އާބަންކޯއިން ވެސް އެއްވެސް ހޭދައެއް ކުރަން ނުޖެހޭނެކަމަށާއި، މަޝްރޫޢަކީ ފުރިހަމައަށް އާބަންކޯއިން ޒިންމާ ނަގާ ގޮތަށް ކުރިއަށްގެންދާ މަޝްރޫއެއްކަމަށް އާބަންކޯގެ މެނޭޖިންގް ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ. 

ބިން ހިއްކައިގެން ތަރައްޤީކުރާ ރަސްމާލެ މަޝްރޫއާ ގުޅޭގޮތުން މައުލޫމާތު ދިނުމަށް އާބަންކޯއިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ފަޒުލް ވިދާޅުވީ، މި މަޝްރޫޢަށް ބޭނުންވާ އެއްވެސް ޚަރަދެއް ސަރުކާރުން ވެސް އަދި އާބަންކޯއިން ވެސް ދޭކަށް ނުޖެހޭނެކަމަށެވެ. އަދި މި މަޝްރޫއަކީ ސަރުކާރުގެ ހިއްސާއެއް ނެތި އާބަންކޯ އިން ޒިންމާވާ ގޮތަށް ކޯޕަރޭޓިވް ގެރެންޓީއަކާ އެކު ފަށާ މަޝްރޫއެއް ކަމަށެވެ. 

ފަޒުލް ވިދާޅުވީ، މި މަޝްރޫގެ އަގު އަދާކުރާނީ ހުޅުމާލެ އާއި ރަސްމާލެ އިން ހިއްކާ ބިމުން ޖުމްލަ 70 ހެކްޓަރު ކޮންޓްރެކްޓަރަށް ދީގެން ކަމަށެވެ.

މީގެއިތުރުން ބިން ހިއްކަން ހަވާލުކުރި ކޮންޓްރެކްޓަރުކަމަށް ވާ ސީއެމްސީއަށް އާބަންކޯއިން ދޭ ބިމުގެ ތެރެއިން 10 ހެކްޓަރުގެ ބިން ދިނުމަށް ނިންމާފައިވަނީ ހުޅުމާލެއިން ކަމުން، އެ ބިންތައް ސީއެމްސީން ބޭނުންވާ ގޮތަކަށް ވިއްކުމުގެ ހުއްދަ އެ ކުންފުންޏަށް ދިން ނަމަވެސް، އެ ބިންތައް ވިއްކަންޖެހޭނީ ހުޅުމާލޭގެ މާސްޓާ ޕްލޭނާ ފުށުނާރާ ގޮތެއްގައި ކަމަށް ވެސް ފަޒުލް ވިދާޅުވިއެވެ. 

އަދި ބިން ވިއްކައިގެން ލިބޭ ފައިސާ ޖަމާކުރާނީ އާބަންކޯގެ އެކްސްކްރޯ އެކައުންޓަކަށް ކަމަށާއި ސީއެމްސީސީއަށް ފައިސާ ދޫކުރާނީ އެ ކުންފުނީގެ ޕްރޮގްރެސިވް ޑިވެލޮޕްމެންޓަށް ބަލާފައި ކަމަށް ވެސް އޭނާ ވިދާޅުވިއެވެ.