ފުށިދިއްގަރުފަޅު ހިއްކާ ރަސްމާލެ ތަރައްގީ ކުރުމުގެ މާސްޓަރ ޕްލޭން ނިމޭއިރު 65000 އާބާދީއަކަށް ބޯހިޔާވަހިކަމުގެ ފުރުސަތު ލިބޭނެ ކަމަށް އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.

ފަޒުލް މިފަދައިން ވިދާޅުވީ ޕީއެސްއެމްގެ ރާއްޖެމިއަދު ޕްރޮގްރާމްގައި ވާހަކަފުޅު ދައްކަވަމުންނެވެ.

މީގެ އިތުރުން ފަޒުލް ވިދާޅުވީ މީގެ ތެރޭގައި އެކިއެކި ރޭންޖުތަކުގެ ހައުސިންގ  ޕްރޮޖެކްޓްސްތައް ވެސް ހިމެނޭކަމަށެވެ. އަދި ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ މެނިފެސްޓޯގައި އިއުލާނުކުރެއްވި ފަދައިން އަދި ރަސްމާލޭގެ އިފްތިތާހީ ޖަލްސާގައި ވެސް އެމަނިކުފާނު ވިދާޅުވި ފަދައިން 5 އިންސައްތައިގެ ލޯން ނެގުމުގެ ފުރުސަތު ފަހިކޮށްދެއްވާނެ ކަމަށާއި އެ މަސައްކަތް ހިނގަމުންދާކަމަށް ވެސް ވިދާޅުވިއެވެ.

ފަޒުލް ވިދާޅުވީ ރައީސް ޑރ.މުއިއްޒު ވިދާޅުވި ފަދައިން ވަކި ހިސާބަކަށް ބިން ހިއްކުމުގެ މަސައްކަތް ނިންމާލުމަށްފަހު ވިޔަސް، އަމާޒަކީ ރައްޔިތުންނަށް ވީއެންމެ އަވަހަށް ބޯހިޔާވަހިކަން ފޯރުކޮށްދެއްވުން ކަމަށެވެ. 

އަދި ރައްޔިތުން ބޭނުންވާނަމަ، އިމާރާތް ބިނާކޮށްފައި ވެސް އަތަށް ތަޅުދަނޑި ހަވާލުކޮށްދެއްވާނެ ކަމަށް ފަޒުލް ވިދާޅުވިއެވެ.

މުސްތަޤްބަލުގައި އެކިއެކި ސްކީމްތަކުގައި ބޯހިޔާވަހިކަން ފޯރުކޮށްދިނުމަށް ރަސްމާލޭގެ ފުރިހަމަ ބޭނުން ހިފޭނެ ކަމަށް ގަބޫލު ކުރައްވާކަމަށް ވެސް ފަޒުލް ވިދާޅުވިއެވެ.