މި ސަރުކާރަކީ މަރުގެ ހުކުމް ތަންފީޒުކުރާނެ ސަރުކާރެއްކަން އިއުލާން ކުރުމާއި ގުޅިގެން، އިންސާނީ ހައްގުތަކުގެ ނަމުގައި އިސްލާމީ ޝަރީއަތަށް ގޮންޖަހާ އިސްލާމްދީނުގެ ހައްދުތަކާއި ދެކޮޅަށް ވަކާލާތު ކުރާ ހިއުމަން ރައިޓްސް ވޮޗް އިން ނުރުހިއްޖެއެވެ.
އެންމެ ފަހުން ދާޚިލީ ސަލާމަތާއި ފަންނިއްޔަތާބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމުގައި މަރުގެ ހުކުމް ތަންފީޒުކުރުމުގައި މިސަރުކާރުގެ ގެންގުޅޭ ސްޓޭންޑާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން ވަޒީރު އިޙުސާން ވަނީ މަރުގެ އަދަބު ތަންފީޒުކުރުމަކީ މި ސަރުކުން ކުރަން ނިންމާފައިވާ މަސައްކަތެއްކަން ހާމަ ކުރައްވާފައެވެ.
"މަރުގެ އަދަބު ތަންފީޒުކުރުމާއި ގުޅޭގޮތުން ބުނާނީ، މިއީ މަރުގެ ހުކުން ތަންފީޒުކުރުމަށް ނިންމާފައިވާ ސަރުކާރެއް. އެކަން ކުރުމަށް ބަލަންޖެހޭ ކަންކަން ބަލާ، ޤާނޫނާއި ގަވައިދުގެ ތެރެއިން ކުރާނަން." ނަމަވެސް، އެކަމާއި ގުޅިގެން ބަލަންޖެހޭ ގިނަ ކަންތައްތަކެއް ހުރިކަން ކަން ފާހަގަކުރައްވައި އިހްސާން ވަނީ އެ ކަންކަން ސަރުކާރުން ކުރައްވާނެކަމަށް ވިދާޅުވެފައެވެ.
ދާޚިލީ ސަލާމަތާއި ފަންނިއްޔަތާބެހޭ ވަޒީރު ޢަލީ އިޙުސާން
ސަރުކާރުގެ މި ސްޓޭންޑް އިއުލާން ކުރުމާއި އެކު، އިސްލާމް ދީނުގެ ހަތުރު، ހިޔުމަށން ރައިޓްސް ވޯޗް އިން ނެރުނު ބަޔާނެއްގައި ވަނީ ސަރުކާރުގެ އެ ނިންމުމާމެދު ދުނިޔެ ކަންބޮޑުވާ ކަމަށް ބުނެފައެވެ.
އަދި މަރުގެ އަދަބު ތަންފީޒު ކުރަން މި ސަރުކާރުން ނިންމި ނިންމުން އަނބުރާ ގެންދަން ޖެހޭ ކަމަށް ވެސް އެ ބަޔާނުގައި ބުނެފައިވެއެވެ.
އެ ބަޔާނުގައި މަރުގެ ހުކުމް ތަންފީޒުކުރުން ސިފަ ކޮށްފައިވަނީ އަނިޔާވެރި އަދި ލާއިންސާނީ އަމަލެއްގެ ގޮތުގައެވެ. އަދި އެކަން އުވާލުމަށް ދުނިޔޭގައި ކުރާ މަސައްކަތާ ރާއްޖޭގެ ޖިނާއީ އަދުލުގެ ނިޒާމު އެއްގޮތް ވާން ޖެހޭ ކަމަށް ވެސް ބުނެފައިވެއެވެ.
ރާއްޖޭގެ ގާނޫނު އަސާސީގައި، ގަސްދުގައި މީހަކު މަރާއިފި މީހާގެ ކިބައިން އިސްލާމީ ޝަރީއަތުގައި ވާފަދައިން ގިޞާސް ހިފަންޖެހޭނެ ކަމަށް އޮތް ނަމަވެސް އެ އަދަބު ތަންފީޒު ކުރާނެ ކަމަށް ސަރުކާރުން އިއުލާން ކުރާ ކޮންމެ ފަހަރަކު ބައިނަލްއަގުވާމީ ޖަމިއްޔާ ޖަމާއަތްތަކުން ރާއްޖެ އަށް ވަރަށް ބޮޑަށް ފިއްތުންތައް ކުރިމަތި ކުރެ އެވެ.
އެގޮތުން ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި އެކަން އިއުލާން ކޮށް، ހުކުމް ތަންފީޒުކުރަށް މަސައްކަތް ފެށުމާއި އެކުވެސް ބައިނަލްއަގުވާމީ ޖަމިއްޔާ ތަކުން ފިއްތުންތައް ކުރިމަތިކުރުވަން ފެށިއެވެ.
އެފަހުން އައި ރައީސް އިބްރާހިމް މުހައްމަދު ޞާލިހުގެ ސަރުކާރުން ވާހަކަ ދައްކަމުން ދިޔައީ ރާއްޖޭގެ ޝަރްޢީ ނިޒާމް އޮތް ގޮތުން މަރަށް މަރު ހިފެން ނެތް ކަމަށް ބުނެއެވެ.
މިވަގުތުވެސް މަރުގެ ހުކުމް އިއްވާފައިވާ 4 މީހަކު އެބަތިއްބެވެ.
Advertisement
This content is created and paid for by advertisers and does not involve Voice Journalists
