ސައޫދީ އަރަބިއްޔާގައި މިހާރު ކުރިއަށްދާ ފީފާ ކުލަބު ވޯލްޑްކަޕް ފުޓްބޯޅަ މުބާރާތުގެ ފައިނަލްގައި 4-0 ގެ ނަތީޖާއަކުން ބްރެޒިލްގެ ފްލުމިނޭންސް ބަލިކޮށް މުބާރާތުގެ ޗެމްޕިއަންކަން މެންޗެސްޓާ ސިޓީ އިން ހޯދައިފި އެވެ.

ކޮޕާ ލިބަޓަޑޯރެސްގެ ޗެންޕިއަން ބްރެޒިލްގެ ފްލުމިނޭންސް މުބާރާތުގެ ފައިނަލުން ޖާގަ ހޯދީ ސެމީ ފައިނަލުގައި އެފްރިކާގެ ޗެންޕިއަން މިސްރުގެ އަލް އަހުލީ 2-0 ގެ ނަތީޖާއަކުން ބަލިކުރުމަށްފަހު އެވެ. އަދި ޔޫރަޕްގެ ޗެމްޕިއަން މެންޗެސްޓާ ސިޓީ އިން މުބާރާތުގެ ފައިނަލުގެ ޖާގައެއް ހޯދީ ސެމީ ފައިނަލުގައި އޭޝިއާގެ ޗެންޕިއަން ޖަޕާނުގެ އުރަވާ ރެޑްސް 3-0 ގެ ނަތީޖާއަކުން ބަލިކުރުމަށްފަހު އެވެ.

ސައޫދީ އަރަބިއްޔާގެ ޖިއްދާގެ ކިންގް އަބްދުﷲ ސްޕޯޓްސް ސިޓީގައި ހުކުރުދުވަހުގެ ރޭ ކުޅެވުނު މިމެޗުގެ ފުރަތަަމަ މިނެޓުގައި މެންޗެސްޓާ ސިޓީ އިން ވަނީ ގޯލެއް ކާމިޔާބުކޮށް މެޗުގެ ލީޑު ހޯދާފައެވެ. މިއީ ކުލަބް ވޯލްޑްކަޕްގެ ތާރީޚުގައި ވެސް މިހާތަނަށް ފެނިގެންދިޔަ އެންމެ އަވަސް ގޯލެވެ. މިގޯލް އެޓީމަށް ކާމިޔާބުކޮށްދިނީ އާޖެންޓީނާގެ ތަރި ޖޫލިއަން އަލްވަރޭޒް އެވެ.

Advertisement

މިއީ އެޓީމުގެ ނެދަލޭންޑްސް ޑިފެންޑަރު ނޭތަން އަކޭ ފްލުމިނޭންސްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ދަނޑީގައިޖެހިފައި ނުކުތް ވަގުތު އެބޯޅަ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ގޯލެކެވެ. އަދި ފުރަތަމަ ހާފު ނިމުމުގެ ކުރިން ސިޓީ އިން ވަނީ އިތުރު ގޯލެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިގޯލަކީ ފުރަތަަމަ ހާފުގެ 27 ވަނަ މިނެޓުގައި ފްލުމިނޭންސްގެ ބްރެޒިލް ޑިފެންޑަރު ނީނޯ އަތުން ބައިކޮޅަށް ވަން ގޯލެކެވެ.

މި ގޯލާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މެންޗެސްޓާ ސިޓީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅެ މެޗު ޑޮމިނޭޓުކުރީ މެންޗެސްޓާ ސިޓީ އިންނެވެ. އެގޮތުން މިހާފުގައި އެޓީމުގެ އެޓީމުން ވަނީ ގޯލްޖަހާނެ ރަގަޅު ގިނަ ފުރުސަތުތަކެއް ތަނަވަސްކޮށްފައެވެ.

މިމެޗުގައި މެންޗެސްޓާ ސިޓީ އިން ކާމިޔާބުކުރި ތިންވަނަ ގޯލު ދެވަނަ ހާފުގެ 72 ވަނަ މިނެޓުގައި ކާމިޔާބުކޮށްދިނީ އިގިރޭސި މިޑްފީލްޑަރު ފިލް ފޮޑެން އެވެ. މިއީ އެޓީމުގެ އާޖެންޓީނާ ފޯވާޑް ޖޫލިއަން އަލްވަރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ގޯލެކެވެ. އަދި މިމެޗުގައި ސިޓީ އިން ކާމިޔާބުކުރި ހަތަރުވަނަ ގޯލު މެޗު ނިމެން ދެމިނެޓަށްވެފައި ވަނިކޮށް ކާމިޔާބުކޮށްދިނީ އެޓީމުގެ ފުރަތަަމަ ލަނޑު ވެސް ކާމިޔާބުކޮށްދިން ޒުވާން ފޯވާޑް ޖޫލިއަން އަލްވަރޭޒް އެވެ. މި ގޯލާއެކު މެޗުގެ ކުޅުން ނިމިގެންދިޔައީ 4-0 ގެ ނަތީޖާއަކުން މެންޗެސްޓާ ސިޓީ ކުރީގައި އޮވެގެންނެވެ. އަދި ފައިނަލް މެޗުގެ މޭން އޮފް ދަ މެޗަކަށް ހޮވުނީ މެންޗެސްޓާ ސިޓީގެ ފޯވާޑް ޖޫލިއަން އަލްވަރޭޒް އެވެ. އޭނާ ވަނީ މިމެޗުގައި ސިޓީއަށް ދެ ގޯލު ކާމިޔާބުކޮށްދިނުމުގެ އިތުރުން އިތުރު ގޯލެއް ޖެހުމަށް އެހީތެރިވެދީފައެވެ.

މުބާރާތުގެ މޮޅު ކުޅުންތެރިޔާއަށް ދޭ ގޯލްޑަން ބޯޅަ ސިޓީގެ މިޑްފީލްޑަރު ރޮޑްރީ އަށް ލިބުނުއިރު، ސިލްވާ ބޯޅަ ލިބުނީ ސިޓީގެ ޑިފެންޑަރު ކައިލް ވޯކާ އަށެވެ. އަދި ބްރައުންޒް ބޯޅަ ލިބުނީ ފްލުމިނޭންސްގެ ކޮލަމްބިއާ މިޑްފީލްޑަރު ޖޯން އަރިއަސް އަށެވެ.