މިމަހުގެ 14 ވަނަ ދުވަހު ހދ.ކުޅުދުއްފުށިން ފެނިފައިވާ ފައިލޭރިއާ ބައްޔާއި ބެހޭގޮތުން އެ ރަށުގައި އުޅޭ އިންޑިއާ ބިދޭސީންނަށް ހާއްސަކޮށް ހޭލުންތެރިކުރުވުމުގެ ސެޝަންތަކެއް ކުޅުދުއްފުށީ ރީޖަނަލް ހޮސްޕިޓަލުން ކުރިއަށް ގެންގޮސްފިއެވެ.

އެ ހޮސްޕިޓަލުން ބުނީ މި ސެޝަންތައް ކުރިއަށްގެންގޮސްފައި ވަނީ ހިންދީ، އުރުދޫ އަދި ތަމަޅަ ބަހުން ކަމަށެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ކުޅުދުއްފުށީގައި އުޅޭ 439 ބިދޭސީ މަސައްކަތްތެރިން ޓެސްޓުކުރެވިފައި ވާއިރު އޭގެ ތެރެއިން މިހާތަނަށް 25 މަސައްކަތްތެރިން މި ބައްޔަށް ފައްސި ވެފައިވާކަމަށެވެ. 

އަދި އެ ރަށުގެ ރައްޔިތުންގެ ރެންޑަމް ސާމްޕަލިންއިން ޓެސްޓްކުރެވުނު އެއްވެސް ފަރާތެއް މި ބައްޔަށް ފައްސި ވެފައެއް ނުވެއެވެ.

ކުޅުދުއްފުށީގެ އިތުރުން ޑިސެންބަރު 22 ވަނަ ދުވަހު ހުޅުމާލޭގައި ކުރިއަށް ގެންދެވުނު މައިގްރޭންޓް ފެއާގައި ޓެސްޓުކުރެވުނު 13 ބިދޭސީންގެ ތެރެއިން އެކަކު ވަނީ މި ބައްޔަށް ފައްސިވެފައެވެ.

ރާއްޖެއިން ނައްތާލެވިފައިވާ ކަމަށް ކަނޑައަޅާފައިވާ މި ބައްޔަށް ފައްސިވެފައިވާ ވޭދަނަތަކެއް އެންމެ ފުރަތަމަ ފެނުނީ ޑިސެންބަރު 1 އަދި 2 ވަނަ ދުވަހު ކުޅުދުއްފުށީގައި ހިންގި ބިދޭސީ މަސައްކަތްތެރިންގެ ސްކްރީނިން ކޭމްޕުގެ ތެރެއިންނެވެ.

މި ފަރާތްތަކަކީ މިހާރު ވެސް ފައިލޭރިޔާ ފެންނަމުންދާ ޤައުމަކުން އައިސްފައިވާ ބައެއް ކަމަށް އެ އެޖެންސީއިން ބުނެއެވެ.

މިކަމާ ގުޅިގެން އެޗްޕީއޭއިން ބުނީ ބަލި ފެނުނު ސަރަހައްދުތަކުން އިތުރު ބިދޭސީން ޓެސްޓުކުރުމުގެ ހަރުދަނާ ނިޒާމުތަކެއް ގާއިމުކުރަމުންދާ ކަމަށެވެ. މިކަމަށް ބޭނުންވާ އިތުރު ޓެސްޓް ކިޓުތައް ދުނިޔޭގެ ސިއްހަތު ޖަމިއްޔާ އާއި ގުޅިގެން ހޯދަމުން ދާކަމަށް ވެސް އެޗްޕީއޭއިން ބުނެއެވެ.

މީގެ އިތުރުން މަދިރި ކޮންޓްރޯލް ކުރުމުގެ ޕްރޮގްރާމްތަކެއް ކުރިއަށް ގެންދިއުމާއި ފައިލޭރިއާ އަށް މީހުން ހޭލުންތެރި ކުރުވުމުގެ ޕްރޮގްރާމްތަކެއް ވެސް އެ އިދާރާއިން ވަނީ ރާވާފައެވެ.

ފައިލޭރިއާ އަކީ އާއްމުކޮށް ހަޑި ފެނުގައި އާލާވާ ކިއުލެކްސް އޭ ކިޔާ މަދިރީގެ ބާވަތަކުން ފެތުރޭ ބައްޔެކެވެ. މިބަލީގެ އާންމު އަލާމާތަކީ ފައި ދުޅަވުން ނަމަވެސް، މި ބަލި ޖެހުމަށްފަހު އެތައްދުވަހެއް ވަންދެން ވެސް ބަލީގެ އެއްވެސް އަލާމާތެއް ނުފެނި ހުރެއެވެ. އަދި ބަލިޖެހޭތާ ގިނަ ދުވަސްތަކަކަށްފަހު ހުންއައުމާއި ހަށިގަނޑުގެ އެކި ބައިތައް ދުޅަވުމާއި ހަންގަނޑު ބޯވުން ފަދަ އަލާމާތްތައް ބަލިމީހާގެ ކިބައިން ފެނެއެވެ.