ފުށިދިއްގަރުފަޅުން ދޫކުރާ 70 ހެކްޓްރުގެ ބިން ދޫކުރަނީ އެބިން ދޫކުރާ 10 އަހަރުގެ މުއްދަތުގެ ތެރޭގައި ބޭނުންވީމައި އަނބުރާ ލިބޭ ގޮތަށް ކަމަށް އެމްއެމްޕީއާރުސީގެ މެނޭޖިންގ ޑިރެކްޓަރު ފާތިމަތު ތައުފީގު ވިދާޅުވެއްޖެއެވެ.

އޭނާ މިފަދައިން ވިދާޅުވީ ސަންގު ޓީވީގެ ސަރުކާރު ޕްރޮގްރާމްގައި ވާހަކަފުޅު ދައްކަވަމުންނެވެ.

އެގޮތުން ބިން އަނބުރާ ހޯދުމަށް ދޭން ޖެހޭނީ މިހާރު އެއްބަސްވެފައި އޮންނަ ފިކްސްޑް ރޭޓް ކަމަށާއި އަނބުރާ ނަގާއިރު ބިމުގެ އަގު ބޮޑުވި ކަމުގައި ވިޔަސް އެދުވަހަކު އޮންނަ ބިމުގެ އަގެއް ދައްކަން ނުޖެހޭނެ ކަމަށް އޭނާ ވިދާޅުވިއެވެ.

Advertisement

މީގެ އިތުރުންވެސް އޭނާ ވިދާޅުވީ 1150 ހެކްޓަރުގެ ބިމުން 70 ހެކްޓަރު ދޫކޮށްލަނީ ބިޒްނަސް މޮޑެލެއްގެ ގޮތުގައި މިހާރު ވެސް ރާއްޖޭގެ ރިސޯޓުތައް ދޫކުރެވޭ އުސޫލުން ކަމަށެވެ. އަދި ދޫކޮށްލަނީ ވެސް 10 އަހަރުތެރޭގައި ބޭނުންވީމަ އެބިން އަބުރާ ލިބޭ ގޮތަށް ކަމަށެވެ.

70 ހެކްޓަރުގެ ބިން ސީއެމްސީސީ އަށް ދޫކޮށްލާއިރު ވެސް އޭގައި ސަރުކާރުގެ ކޮންޓްރޯލް އޮންނާނެ ކަމަށާއި އެ ހެކްޓަރުގައި ވެސް ދިވެހި ރާއްޖޭގެ ގާނޫނު ހިނގާނެކަމަށް ވެސް ފާތިމަތު ވިދާޅުވިއެވެ. އަދި އެތަން ތަރައްގީ ކުރަން ޖެހޭނީ މާސްޓަރ ޕްލޭނާ އެއްގޮތަށް އާބަންކޯ އާއި ކުންފުންޏާއި ދެމެދު ވެފައިވާ އެގްރީމެންޓާއި އެއްގޮތަށް ކަމަށް ވެސް އޭނާ ވިދާޅުވިއެވެ.

ފާތިމަތު ވިދާޅުވީ 70 ހެކްޓަރުގެ ބިން ދޫކޮށްލައި ވިއްކާލިއްޔޭ ބުނުމުގެ ފުރުސަތެއް ނެތް ކަމަށާއި ބަޔަކު އަދި އޮޅުވާލިކަމުގައި ވިޔަސް އެ މައުލޫމާތަކީ ހާމައަށް ފެންނަށް ހުރި މައުލޫމާތު ކަމަށެވެ.

ފުށިދިއްގަރުފަޅު ހިއްކަނީ ހުޅުމާލޭއިންނާއި ރަސްމާލެ އިން ޖުމްލަ 70 ހެކްޓަރުގެ ބިން ސީއެމްސީސީ އަށް ދޭގޮތަށް ކަމުގައި އެ މަސައްކަތް ކުރުމުގައި އިސްކޮށް އުޅޭ އާބަންކޯއިން ވަނީ ބުނެފައެވެ.

ފުށިދިއްގަރުފަޅު މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ޕްލޭނުގައި ހިމަނާފައެވެ.

މި މަޝްރޫއު މުޅިން ނިމޭއިރު، މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމުގެ ޔަގީންކަން ދެއްވާކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ.